Jak infarmuje pres-słužba milicyi Minskaj vobłaści, dvoje žycharoŭ Smalenskaj vobłaści pryjechali ŭ Biełaruś, majučy vialikuju sumu hrošaj na nabyćcio miasa.
Ich biełaruski znajomy paabiacaŭ dapamahčy, a sam, razumiejučy, što rasijanie dziejničajuć nie zusim zakonna, vyrašyŭ ich «kinuć». Dla hetaha jon ustupiŭ u zmovu z dyrektaram kampanii-pieravozčyka, jaki i pradastaviŭ dla miasa furu.
Kali hruzavik napoŭniŭsia nabytaj pradukcyjaj, adnojčy ŭviečary na adnoj z daroh jaho spyniŭ «milicyjant», pobač stajaŭ aŭtamabil z probliskavymi majačkami. Nieviadomy pravieryŭ dakumienty ekśpiedytara-rasijanina i zajaviŭ, što jany mohuć być falšyvymi. Dla raźbiralnictva furu zaviazuć u Vałožynski RAUS i, najchutčej, miasa budzie kanfiskavanaje. Zamiežnika pakinuli na darozie, a abiedźvie mašyny źjechali.
Raźlik biełarusaŭ-złamyśnikaŭ byŭ na toje, što rasijanie ŭ milicyju nie źviernucca. Adnak tyja źviarnulisia. Sprava ŭ tym, što patračanyja na miasa 40 tysiač dołaraŭ byli treciaj asoby, i ich treba było viarnuć. U RAUS ździvilisia pytańniu pra furu, pačałosia rasśledavańnie. Vyjści na złamyśnikaŭ udałosia paśla taho, jak kiroŭcu fury paŭtorna dapytali z dapamohaj palihrafa. Kryminalnuju spravu raspačali pa artykule «kradziež, ździejśnieny arhanizavanaj hrupaj u asabliva bujnym pamiery».
Adznačajecca, što rasijanie vykazali ździŭleńnie biełaruskim milicyjantam, što ŭ Biełarusi ŭ 2016-m ich «kinuli» tak, jak heta adbyvałasia ŭ Rasii ŭ dalokija 1990-ja.
