Biełteleradyjokampanija ŭ adkaz na videazajavu svajho hukarežysiora Uładzimira Žołudzia, jaki 15 lutaha abjaviŭ haładoŭku z-za niespraviadlivaj, na jaho dumku, sistemy apłaty pracy ŭ miedyjachołdynhu, pryniała rašeńnie nadać hałosnaści sapraŭdnyja ŭmovy pracy svajho supracoŭnika i raźmiaściła na svaim sajcie adpaviednuju infarmacyju.
«Hukarežysior 2-j kvalifikacyjnaj katehoryi Uładzimir Žołudź pracuje ŭ miedyjachołdynhu na 0,5 staŭki i za 2015 hod mieŭ siaredniamiesiačnuju zarpłatu bolš za 7 młn rubloŭ. Za prajekt «Jeŭrabačańnie» jamu byŭ vypłačany hanarar u pamiery 1 młn 150 tys. rubloŭ», — adznačajecca ŭ paviedamleńni. Akramia hetaha kiraŭnictva adździeła hukarežysioraŭ chadajničała ab premiravańni Žołudzia pa vynikach prajekta ŭ pamiery 1 młn rubloŭ, što 10 lutaha było padtrymana kiraŭnictvam kampanii.
«Da ŭsiaho varta dadać, što hety supracoŭnik, jaki pracuje na paŭstaŭki, pražyvaje ŭ internacie, pradastaŭlenym jamu Biełteleradyjokampanijaj, za jaki płacić kala 100 tys. rubloŭ štomiesiac», — adznačaje NDTRK.
Zakančvajecca paviedamleńnie frazaj: «Žurnalisty Biełteleradyjokampanii, roŭna jak i mnohija minčuki, jakija arandujuć kamiercyjnaje žyllo, napeŭna pazajzdrościać našamu hukarežysioru».
Sam Žołudź pakul nie daje kamientaraŭ žurnalistam. Praz svaich kalehaŭ jon pieradaŭ BiełaPAN: «Pakul trymajusia. Dobraje soniečnaje nadvorje dapamahaje».
15 lutaha Žołudź raźmiaściŭ na svajoj staroncy ŭ sacyjalnaj sietcy «UKantakcie» videazvarot, u jakim kaža pra nizkuju apłatu pracy ŭ miedyjachołdynhu, u pryvatnaści pracy hukarežysioraŭ. Jon adznačyŭ, što padstavaj dla abviaščeńnia haładoŭki pasłužyła padrychtoŭka i pramaja tranślacyja nacyjanalnaha adboru na «Jeŭrabačańnie». Za tydniovuju «vielmi technałahičnuju i ciažkuju» hukarežysiorskaj pracu ŭ režymie z 9—10 ranicy da 22—24 hadzin «biez haračaha charčavańnia i pierapynku na abied» jon atrymaŭ 600 tys. rubloŭ. Žołudź taksama padkreśliŭ, što haładoŭka — heta nie ŭltymatum, a sposab danieści prablemu da načalstva. Na 23 lutaha jon zapisany na pryjom da kiraŭnictva kampanii.
