Ciaham minułaha tydnia prarasijskaja prapahanda zasiarodziła svaju ŭvahu ŭ asnoŭnym na «adkaznaści Jeŭropy» za mihracyjny kryzis i za toje, što Ukraina bolš «nie cikavaja Zachadu».
Rupar Kramla Dźmitryj Kisialoŭ
Pra heta havorycca ŭ čarhovym vypusku ahladu DisinfoReview, padrychtavanym ŭ ofisie viarchoŭnaha pradstaŭnika ES pa pytańniach zamiežnych spraŭ i palityki biaśpieki Fiederyki Mahieryni, u jakim abviarhajucca mify rasijskaj prapahandy.
Na praciahu apošnich dzion lidaraŭ ES abvinavačvali za ŭsio, što adbyvajecca niapravilna ŭ pytańniach biežancaŭ, u tym liku za tapielcaŭ u Mižziemnym mory.
Prakramloŭskija ahladalniki adznačali, što «Hiermanija i ES cynična źniščajuć Hrecyju», adpraviŭšy tudy biežancaŭ ź Blizkaha Ŭschodu, što ES chutka abryniecca pad hruzam prablem, źviazanych ź biežancami, i što hałoŭnaj pryčynaj abvału budzie Anhieła Mierkiel. Niahledziačy na vidavočnaść taho, što Rasija bambić mirnych žycharoŭ u Siryi, kaleha Kisialova, Uładzimir Sałaŭjoŭ, taksama śćviardžaŭ, što ZŠA i ES absalutna nie chvalujucca pra toje, kolki arabaŭ było zabita.
Taksama ŭ ahladalniki DisinfoReview adznačajuć, što prakramloŭskija ŚMI pieraaryjentavalisia na Ukrainu. Asnoŭnaja masa paviedamleńniaŭ ad prapahandystaŭ RF tyčyłasia taho, što ZŠA i ES užo «stamilisia ad Ukrainy».
Akramia taho, rasijskija prapahandysty nie zabyvali nahniatać temu pahrozy hłabalnaj jadziernaj vajny. Tak, Ihar Karotčanka, hałoŭny redaktar časopisa «Nacyjanalnaja abarona» łaskava nahadaŭ, što «amierykancy pavinny zrazumieć, što lubaja naziemnaja apieracyja ŭ Siryi pryviadzie da hłabalnaj jadziernaj vajny».
