Narodny artyst Biełarusi Anatol Jarmolenka ŭ efiry prahramy «Karcina śvietu» na kanale «RTR-Biełaruś» adznačyŭ, što siońnia biełarusy žyvuć u zusim inšy čas. Raniej mnohim ludziam davodziłasia zajmacca ciažkaj ručnoj pracaj. «Było vielmi ciažka, čakali hetaj piensii, kab adpačyć. Ciapier absalutna inšyja ŭmovy žyćcia. Mnohija mužčyny, naprykład, i ŭ 60 hadoŭ mohuć siabie dalej realizoŭvać», — skazaŭ artyst.
Hetuju dumku padtrymała i hienieralny dyrektar Biełaruskaj asacyjacyi strachoŭščykaŭ Iryna Mierźlakova. Pavodle jaje, dla žančyny sychodzić na piensiju ŭ 55 hadoŭ — heta raskoša. Bolšaść z tych, chto pracuje ŭ ofisie, u śfiery navuki i kultury, finansavaj sistemie i inšych halinach, i paśla 55-ci hadoŭ žadajuć zastacca na pracoŭnym miescy.
Pavyšeńnie piensijonnaha ŭzrostu — vielmi składany krok dla luboj dziaržavy, źviarnuŭ uvahu namieśnik ministra pracy i sacyjalnaj abarony Valeryj Kavalkoŭ. Pavodle jaho, tut treba ŭzvažyć usie za i suprać, jak ekanamičny, tak i sacyjalny aśpiekt. Siońnia hramadstva staić pierad nieabchodnaściu pavialičvać piensijny ŭzrost, što tłumačycca skaračeńniem kolkaści nasielnictva ŭ pracazdolnym uzroście.
Pa statystycy, ciapier na adnaho čałavieka, jaki znachodzicca va ŭzroście starejšym za pracazdolny (55—60 hadoŭ i vyšej), prychodzicca 2,3 čałavieka ŭ pracazdolnym. Hety bałans dazvalaje vypłačvać piensii na siońniašnim uzroŭni. U 2030 hodzie na adnaho čałavieka ŭ piensijnym uzroście budzie prychodzicca 1,7 rabotnika. Uźniknie pytańnie: albo źnižać ŭzrovień piensijnaha zabieśpiačeńnia, albo pavialičvać strachavuju nahruzku.
Valeryj Kavalkoŭ adznačyŭ, što siońnia siaredni pakazčyk znachodžańnia na piensii paśla vychadu ŭ 60 hadoŭ u mužčyn składaje praktyčna 16 hadoŭ. Z 2008 hoda jon pavialičyŭsia na 1 hod.
U žančyn siaredniaja praciahłaść atrymańnia piensii paśla taho, jak spoŭnicca 55 hadoŭ, składaje praktyčna 26 hadoŭ. Za apošnija 7 hadoŭ hety pieryjad pavialičyŭsia na 2 hady i try miesiacy. Heta śviedčyć pra toje, što praciahłaść žyćcia nasielnictva ŭ Biełarusi raście.
