Byłaja pacyjentka pra doktara, jaki abaraniŭ dysiertacyju pa-biełarusku: «Vy ŭratavali maich dziaciej! Ščaścia vam!»
![](http://nnexpictures.fra1.digitaloceanspaces.com/img/w732d4webp1/photos/z_2016_03/vitushka_andrej1-vrmcb.jpg.webp)
U kamientach na NN.BY i ŭ sacyjalnych sietkach — škvał vinšavańniaŭ Andreju Vitušku — doktaru, jaki pieršym za doŭhi čas abaraniŭ dysiertacyju pa miedycynie na biełaruskaj movie.
Voś što napisała ŭ NN Halina: «Andrej Vituška ratavaŭ maich niedanošanych dzietak u 2005 hodzie. Kali ja telefanavała ŭ reanimacyju i čuła jaho dobry hołas na biełaruskaj movie, na dušy niejak ciapleła. Pa ščyraści, tak i nie pabačyłasia ź im paśla vypiski, nie padziakavała. Ale ŭvieś čas pamiataju pra jaho. Dumaju, siońnia vielmi mnohija ludzi rady za Andreja Vitušku. Ščaścia vam, Doktar, — i ŭ pracy, i ŭ siamji».
37-hadovy dziciačy reanimatołah ź Minska Andrej Vituška pracuje ŭ Respublikanskim navukova-praktyčnym centry «Maci i dzicia», u jaho 15-hadovy staž raboty.
Jahonaja dysiertacyja datyčyła vyjaŭleńnia pryčyn i praduchileńnia unutračarapnych kryviaźlićciaŭ u niedanošanych dzietak vahoj ad 500 da 1500 hramaŭ.
Dysiertacyjnaja prahałasavała «za» adnahałosna: usie 11 členaŭ.
Vituška — vypusknik Biełaruskaha miedycynskaha ŭniviersiteta. U čas vučoby jon byŭ adnym ź lidaraŭ Zadzinočańnia biełaruskich studentaŭ.
Siamja Vituškaŭ aktyŭna zajmajecca i hramadskaj dziejnaściu. Žonka Andreja Kryścina, naprykład, uznačalvaje apiakunskuju radu adnoj ź biełaruskamoŭnych himnazij Minska.
Niezvyčajnaść abarony dysiertacyi Vituškam u tym, što heta adna ź pieršych biełaruskamoŭnych abaronaŭ u miedycynie za doŭhi čas.
«Što da biełaruskaj movy, to pieršaje ździŭleńnie navukovaj rady pierajšło ŭ pavahu. Usie adznačyli vysoki navukovy ŭzrovień, praktyčnuju značnaść i aktualnaść daśledvańnia, tema na vastryi cikavaści śpiecyjalistaŭ usiaho śvietu, — adznačaje śviedka abarony. — Darečy, Andrej paśpiachova prezientoŭvaŭ svaje dośledy za miažoj i pa-rusku, i pa-anhielsku i pa-niamiecku, pryvoziŭ uznaharody za najlepšy vynik i z Maskvy, i z Zalcburha, vysokija adznaki dysiertacyi dasłali z Kijeva, Sankt-Pieciarburha i inšych zamiežnych navukovych centraŭ».
«Naša Niva» dałučajecca da vinšavańniaŭ.
Kamientary