Palityki i hramadskija aktyvisty atrymlivajuć składzienyja zavočna pratakoły za ŭdzieł u akcyi 25 sakavika z nahody Dnia Voli.
U pryvatnaści, pratakoł byŭ składzieny na sustaršyniu arhkamiteta pa stvareńni partyi «Biełaruskaja chryścijanskaja demakratyja» Paŭła Sieviarynca. Jak paviedamiŭ palityk, dakumient byŭ dasłany na adras jaho baćkoŭ u Viciebsku. Pry hetym pratakołaŭ było dva: za ŭdzieł u akcyi z nahody Dnia Voli 25 sakavika i pikiecie ŭ padtrymku asudžanaj u Rasii ŭkrainskaj lotčycy Nadziei Saŭčanki, jaki prajšoŭ 21 sakavika kala rasijskaha pasolstva ŭ Minsku.
Pavodle infarmacyi Sieviarynca, pratakoł taksama byŭ składzieny na hramadskaha aktyvista Leanida Kułakova.
Akramia taho, zavočna składzieny pratakoł za ŭdzieł u akcyi z nahody Dnia Voli na staršyniu Abjadnanaj hramadzianskaj partyi Anatola Labiedźki. Pra heta jon paviedamiŭ na svajoj staroncy ŭ sacyjalnaj sietcy «Fejsbuk».
Pieršapačatkova šeście na Dzień Voli płanavałasia ad Akademii navuk pa praśpiekcie Niezaležnaści da parku Janki Kupały, adnak Minharvykankam źmianiŭ maršrut, prapanavaŭšy arhanizataram sabrać ludziej kala kinateatra «Kastryčnik» i prajści pa vulicy Surhanava da parku Družby Narodaŭ kala płoščy Banhałor i pravieści mitynh. Arhanizatary nazvali rašeńnie harvykankama pravakacyjnym i zaklikali hramadzian sabracca na placoŭcy kala kinateatra «Kastryčnik», što dazvolena ŭładami, i ŭžo na miescy vyznačycca z maršrutam šeścia. U toj ža čas adzin ź lidaraŭ apazicyi, były palitviazień Mikałaj Statkievič, zajaviŭ pra namier uskłaści kvietki da pomnika Janku Kupału ŭ adnajmiennym skviery, kab vykazać padziaku zasnavalnikam BNR i dziejačam nacyjanalnaha adradžeńnia, a zatym dałučycca da ŭdzielnikaŭ asnoŭnaj akcyi. Sieviaryniec i Labiedźka brali ŭdzieł va ŭskładańni kvietak da pomnika Janku Kupału, vystupiŭšy kala jaho pierad inšymi ŭdzielnikami mierapryjemstva.
