Staršynia Abjadnanaj hramadzianskaj partyi Anatol Labiedźka 12 krasavika aštrafavany sudom Centralnaha rajona Minska za ŭdzieł u akcyi 25 sakavika z nahody Dnia Voli na 50 bazavych vieličyniaŭ (10,5 młn rubloŭ).
Palityk pryznany vinavatym pa č. 3 art. 23.34 KoAP. Rašeńnie ab administracyjnym štrafie pryniała sudździa Viktoryja Šabunia.
«Čarhovy sudovy praces. Pa kolkaści teatralizavanych mierapryjemstvaŭ, tannych śpiektaklaŭ i akcioraŭ-samavukaŭ Biełarusi niama roŭnych u Jeŭropie. Sistema takaja, što ihrać vymušany mnohija. Adny, naciahnuŭšy na siabie čornuju mantyju, prykidvajucca sudździami, druhija, atrymaŭšy kamandu «fas», robiać vyhlad, što kirujucca vyklučna zakonam, trecija, zrabiŭšy čarhovuju podłaść, niešta marmyčuć ab nieabchodnaści karmić svaich dziaciej. Ludzi-maski. Doma jany kažuć adno, na pracy druhoje, u kole znajomych treciaje. Mimikryja samy raspaŭsiudžany dyjahnaz u Biełarusi», — cytuje Labiedźku pres-słužba AHP.
Pratakoły za ŭdzieł u akcyi 25 sakavika taksama byli składzienyja ŭ dačynieńni da Alaksieja Janukieviča, Vitala Rymašeŭskaha, Anatola Šumčanki, Mikałaja Statkieviča, Uładzimira Niaklajeva, Paŭła Sieviarynca i inšych.
Pry hetym u dačynieńni da Janukieviča, Rymašeŭskaha i Šumčanki administracyjnyja pratakoły byli składzienyja za ŭdzieł u mitynhu kala staličnaha kinateatra «Kastryčnik». Heta placoŭka źjaŭlałasia dazvolenym Minharvykankamam miescam zboru ŭdzielnikaŭ akcyi z nahody Dnia Voli. Pierad pačatkam šeścia pa vulicy Surhanava apazicyjnyja palityki vystupili pierad prysutnymi.
Statkievič, Niaklajeŭ, Labiedźka i Sieviaryniec brali taksama ŭdzieł va ŭskładańni kvietak da pomnika Janku Kupału ŭ adnajmiennym skviery, mitynhu tam ža i šeści pa praśpiekcie Niezaležnaści da kinateatra «Kastryčnik», što nie było sankcyjanavana minskimi ŭładami.
