U Baranavičach pierad sudom paŭstanuć try navučenki druhoha kursu prafiesijnaha liceja ŭ Baranavickim rajonie, jakija raspaŭsiudzili parnahrafičnuju vyjavu z tvaram svajoj adnahrupnicy.
Jak paviedamiŭ aficyjny pradstaŭnik upraŭleńnia Śledčaha kamiteta pa Bresckaj vobłaści Maryna Drańkova, adna ź dziaŭčyn vosieńniu 2015 hoda na svoj mabilny telefon zahruziła ź internetu vidarys parnahrafičnaha charaktaru z udziełam mužčyny i žančyny. Zatym, vykarystoŭvajučy śpiecyjalnuju prahramu, na miesca tvaru žančyny ŭstaviła fota svajoj adnahrupnicy. Jak rastłumačyła padślednaja, jana adčuvała da toj niepryjaznaść.
Adredahavanaje fota liceistka zachavała ŭ pamiaci telefona i adpraviła praź blutuz svajoj znajomaj.
14 studzienia 2016 hoda na zaniatkach ŭ licei hetaja abvinavačanaja pakazała dvum siabroŭkam vyrablenuju vyjavu i prapanavała raźmiaścić jaje ŭ sacyjalnaj sietcy, na što tyja pahadzilisia. Jany raźmiaścili parnahrafičnuju karcinku na «ścianie» internet-staronki (u adkrytym dostupie), paśla čaho infarmavali pra jaje inšych karystalnikaŭ sacyjalnaj sietki.
Akramia taho, fota było dasłanaje praz asabistyja paviedamleńni paciarpiełaj na jaje internet-staronku. Na nastupny dzień taja źviarnułasia da administracyi liceja, prademanstravaŭšy karcinku. Kiraŭnictva navučalnaj ustanovy paviedamiła ŭ pravaachoŭnyja orhany.
Pad padazreńnie va ŭčynieńni supraćpraŭnych dziejańniaŭ adrazu ž trapili niekalki adnahrupnic paciarpiełaj.
Baranavickim mižrajonnym adździełam Śledčaha kamiteta paśla zaviaršeńnia rasśledavańnia trom dziaŭčatam vystaŭlenaje abvinavačańnie na padstavie č. 2 art. 343 KK (vyrab i raspaŭsiudžvańnie parnahrafičnaj vyjavy, ździejśnienaje hrupaj pavodle papiaredniaj zmovy z vykarystańniem hłabalnaj kampjutarnaj sietki internet).
Pryciahvać stvaralnicu parnahrafičnaha vidarysu da kryminalnaj adkaznaści za abrazu paciarpiełaja nie zachacieła. Na momant ździajśnieńnia złačynstva fihurantkam kryminalnaj spravy było pa 16 hadoŭ. Materyjały vyvučanyja prakuroram i nakiravanyja ŭ sud dla razhladu.
