Eks-sienatarka Hanna Šarejka, jakaja znachodzicca na łavie padsudnych, i abvinavačany pa hetaj ža spravie litoŭski biznesmen Valdemaras Norkus sprabujuć aficyjna aformić svaje adnosiny. Adnak, jak paviedamlaje «Radyjo Svaboda», pary ŭžo nieadnarazova admaŭlajuć u hetym.
Hanna Šarejka, laviej na fota — biznesmen Norkus. Fota: Vadzim Zamiroŭski, TUT.BY
U pačatku sudovaha pracesu stała jasna, što ŭžo praciahły čas Hannu Šarejka źviazvajuć blizkija adnosiny z partnioram pa biznesie, litoŭcam Valdemarasam Norkusam. Mužčyna ciapier taksama na sudovaj łavie. Akazałasia, što jašče ŭ sakaviku para padała zajavu ŭ zahs, niadaŭna jany zajavili ŭ sudzie chadajnictva ab praviadzieńni rośpisu ŭ śledčym izalatary.
Čakałasia, što paśla pierapynku ŭ sudovym pracesie hetaja prośba budzie vykananaja — ale nie.
Abaronca adnaho z padsudnych patłumačyŭ «Radyjo Svaboda», što heta nie pieršaja sproba Šarejki i Norkusa ažanicca.
«Im znoŭ admovili ŭ šlubie. Heta ŭžo nie pieršy raz. Jany ŭparta sprabujuć atrymać taki dazvoł, bo heta ich prava, ale dazvołu tak ža ŭparta nie dajuć. Choć zakon nie zabaraniaje šluby nie tolki ŭ turmie, ale i ŭ śledčym izalatary, jašče da zakančeńnia pracesu. Čamu tak robiać? Mahčyma, heta źviazana ź linijaj abvinavačvańnia, jakoje ličyć, što pamiž imi ŭtvarylisia blizkija adnosiny i jany nibyta z-za hetaha dziejničali ŭ vyznačanym kirunku. Ale ja liču takoje staŭleńnie niedakładnym. Heta ž šlub, blizkaść, jak heta možna nie dazvalać…».
Darečy, siońnia sud admoviŭ prakuroru Miacielskamu ŭ ahałošvańni telefonnaj razmovy z udziełam Hanny Šarejka. «Heta asabistaje», — rastłumačyŭ sudździa Uładzimir Davydaŭ i zabaraniŭ ahučvać zapis. Na dumku boku sienatara, hety zapis naohuł nie pavinien była trapić u spravu, bo tyčycca asabistaha žyćcia padsudnaj.
«Na žal, takaja linija śledstva. Dobra, što sud heta abmiažoŭvaje», — skazaŭ advakat Hanny Šarejka.
***
U Viarchoŭnym sudzie praciahvajecca słuchańnie kryminalnaj spravy ŭ dačynieńni da sienatara Hanny Šarejka i jašče šaści supracoŭnikaŭ fabryki i pradstaŭnikoŭ kampanij-pastaŭščykoŭ, im vystaŭlenaje abvinavačvańnie ŭ złoŭžyvańni ŭładaj abo słužbovymi paŭnamoctvami, učynienym arhanizavanaj hrupaj (art. 18, č. 3 art. 424 KK). Pa viersii śledstva, Šarejka, budučy hiendyrektaram Viciebskaj brojlernaj ptuškafabryki, ustupiła ŭ karupcyjnuju zmovu sa svaim sužycielem Valdemarasam Norkusam, dyrektaram litoŭskaj firmy «Dajmas» i zasnavalnikam kampanii «Ruskam-R», praź jakuju išli pastaŭki ŭ Viciebsk kambikarmoŭ i karmavych dabavak.
Pa słovach prakurora, firma Norkusa dla zajaŭki na konkursie vystaŭlała zaviedama zanižanuju canu, ale potym košt pavialičvaŭsia za košt transpartnych vydatkaŭ i mytnych płaciažoŭ. U vyniku kančatkovaja cana zamiežnaha kambikormu była značna vyšejšaja za ajčynnuju. Dziaržabvinavačańnie aceńvaje škodu ŭ 4 młrd rubloŭ.
Svaju vinu nie pryznała jak Šarejka, tak i jaje byłyja namieśniki Nadzieja Siemčankova, Jaŭhien Kanavalčanka i Mikałaj Kamaroŭ, i partniory Valdemaras Norkus i Michaił Razžyvin.
Šarejka znachodzicca pad vartaj sa žniŭnia 2014 hoda. Pry hetym u 2011-2013 hadach, kali, pa acency śledstva, dziejańni abvinavačanych nanosili fabrycy škodu, Viciebskaja brojlernaja ptuškafabryka była prybytkovaj, a 2014 hod skončyła ŭ pieršaj dvaccatcy samych prybytkovych AAT krainy (150 młrd rubloŭ čysty prybytak). Pa vynikach troch kvartałaŭ 2015 hoda, pavodle dadzienych Minfina, jaje čystyja straty skłali 30 młrd rubloŭ.
