46-hadovy kanadziec Krejh Vudkraft pryznačany novym hałoŭnym trenieram chakiejnaha kłuba «Dynama» (Minsk).
pressball.by
Trenierskuju karjeru pačaŭ u siezonie-2014/2015 u roli pamočnika ŭ kłubie niamieckaj lihi «Adler» (Manhiejm). Kamanda vyjhrała rehularnaje pieršynstvo i pieramahła ŭ płej-of. Akramia taho, Vudkraft byŭ asistentam hałoŭnaha treniera biełaruskaj zbornaj Dejva Ljuisa ŭ nacyjanalnaj zbornaj Biełarusi, jakaja vyjšła ŭ čverćfinał suśvietnaha pieršynstva, adznačajecca ŭ paviedamleńni pres-słužby «Dynama».
Ciapierašni siezon «Adler» pačaŭ niaŭdała. Paśla zvalnieńnia hałoŭnaha treniera kamanda była davierana Vudkraftu, adnak vyvieści jaje z kryzisu nastaŭnik nie zdoleŭ: finišavaŭšy na 10-m miescy ŭ rehularnym čempijanacie, «Adler» sastupiŭ u stykavych matčach za vychad u nakaŭt-raŭnd.
Zaraz Vudkraft znachodzicca ŭ raźmiaščeńni zbornaj Biełarusi, ź jakoj nieŭzabavie adpravicca na čempijanat śvietu ŭ Maskvu i Sankt-Pieciarburh.
Kanadziec paviedamiŭ, što pieršyja pradmietnyja pieramovy pamiž im i kłubam pačalisia «dzion dziesiać tamu». «Pierš za ŭsio ja pahadziŭsia na hetu prapanovu tamu, što vielmi ŭpadabaŭ Biełaruś i Minsk padčas pracy z nacyjanalnaj zbornaj. Akramia taho, ja davoli šmat viedaju pra historyju vašaj kamandy i KCHŁ u cełym. Heta adna ź viadučych chakiejnych lih śvietu, «Dynama» ž — adna ź lepšych kamand u jaje miežach. Tak što dla mianie heta vydatnaja mahčymaść, i ja z radaściu pasprabuju tut svaje siły», — skazaŭ Vudkraft.
«Zaprašeńnie Krejha Vudkrafta — čarhovy krok u pracesie kansalidacyi namahańniaŭ našaha kłuba i zbornaj Biełarusi pa raźvićci biełaruskaha chakieja, — zajaviŭ staršynia naziralnaha savieta «Dynama», ministr unutranych spraŭ Ihar Šunievič. — Hety trenier vydatna znajomy ź biełaruskimi chakieistami, vialikaja kolkaść jakich prajšła na praciahu apošnich dvuch siezonaŭ praz nacyjanalnuju kamandu. Jaho praca ŭ trenierskim štabie zbornaj dapamoža nam ruchacca sinchronna z kamandaj Dejva Ljuisa, zdabyvajučy karyść z supracoŭnictva i paźbiahajučy supiarečnaściaŭ».
«Mocny bok Krejha — navyki pa raźvićci maładych hulcoŭ, mnohim ź jakich jon dapamoh dasiahnuć bolš vysokaha ŭzroŭniu. Akramia taho, Vudkraft vydatna viedaje paŭnočnaamierykanski i jeŭrapiejski rynki hulcoŭ, što dapamoža nam zrabić pravilny vybar pry zaprašeńni lehijanieraŭ. Pierad našym kłubam pastaŭleny surjoznyja zadačy, i my pierakananyja, što Krejh Vudkraft — mienavita toj śpiecyjalist, jaki zdolny ich vyrašyć», — skazaŭ Šunievič.
U minułym siezonie «Dynama» nie zmahło vyjści ŭ płej-of KCHŁ. Kamandaj kiravali słavak Lubamir Pokavič i Andrej Kavaloŭ. Pierad pačatkam siezona byli aryštavanyja top-mieniedžary kłuba Maksim Subotkin i Uładzimir Bieražkoŭ.
Situacyja ŭ «Dynama» abmiarkoŭvałasia 25 krasavika na sustrečy Šunieviča i Alaksandra Łukašenki. «Ja absalutna nie źbirajusia ŭmiešvacca ŭ rasstanoŭku kadraŭ. Heta vaša prerahatyva. Z kim chočacie, rajciesia, ale ŭ nastupnym hodzie treba pakazvać vynik. My płacim niemałyja hrošy. Darečy, taksama treba ekanomna da hetaha stavicca. I addača pavinna być. Vy sami heta razumiejecie nie horš za mianie», — zajaviŭ biełaruski kiraŭnik.
