Padčas naviedańnia Litvy nobeleŭskaja laŭreatka Śviatłana Aleksijevič nazvała złačynstvam rašeńnie biełaruskich uładaŭ budavać Astravieckuju AES, paviedamlaje litoŭski telekanał TV3.
«Ja dumaju, što heta złačynstva. Złačynstva, jakoje havoryć pra toje, što my nie zrazumieli Čarnobylskaj katastrofy, nie zrabili vysnoŭ», — skazała piśmieńnica na pytańnie, jak jana aceńvaje prajekt Astravieckaj AES. Pytańnie było zadadzienaje ŭ subotu padčas sustrečy z hledačami paśla premjery spektaklu pavodle jaje knihi «Čarnobylskaja malitva» u Paniavieskim dramatyčnym teatry imia Juozasa Milcinisa.
Aleksijevič ličyć, što ludzi jak śled nie ŭśviadomili, jakoj katastrofaj była avaryja ŭ Čarnobyli, bo z raspadam Savieckaha Sajuzu ich uvaha była zaniataja inšymi prablemami — strataju pracy, razvałam systemy.
Piśmieńnica taksama skazała, što rašeńnie budavać atamnuju elektrastancyju prymaŭ adzin čałaviek — aŭtarytarny kiraŭnik Biełarusi Alaksandar Łukašenka.
«Biełaruś — zakrytaja, aŭtarytarnaja systema, i tema Čarnobylu — taksama zakrytaja tema. Aŭtarytarnaja systema nia dumaje pra čałaviečaje žyćcio jak kaštoŭnaść, nia dumaje pra budučyniu nacyi, a tolki pra prablemy ŭłady. Hramadztva paralizavanaje stracham, niaspynnym kantrolem. My niazdolnyja zapiarečyć, u nas niama ni antyatamnaha ruchu, ni sapraŭdnaha ekalahičnaha ruchu, bo ŭłady kantralujuć usio», — skazała Aleksijevič.
«U aŭtarytarnaj krainie ŭsio vyrašaje adzin čałaviek, heta jon vyrašyŭ, kab my budavali atamnuju elektrastancyju. A paralizavanaje hramadztva maŭčyć», — zaznačyła piśmieńnica.
Litva vystupaje z vostraj krytykaj pabudovy Biełaruśsiu AES za 50 kilametraŭ ad Vilni. Litva ćvierdzić, što Biełaruś nie zabiaśpiečvaje biaśpieki prajektu. Miensk abviarhaje zakidy Litvy, ćvierdziačy, što na stancyi buduć zabiaśpiečanyja najvyšejšyja standarty biaśpieki.
