Kandydat ad lejbarysckaj partyi Sadyk Chan atrymaŭ pieramohu na vybarach mera Łondana. Pra heta paviedamlaje The Telegraph.

Pavodle papiarednich źviestak pieršaha raŭndu padliku hałasoŭ, jakija pryvodzić The Guardian, za Chana prahałasavali 44% vybarščykaŭ. Asnoŭny supiernik Chana - kansiervatar Zak Hołdśmit — nabraŭ 35% hałasoŭ.
Aficyjnyja vyniki vybaraŭ mera Łondana buduć abvieščanyja paźniej.
Sadyk Chan — syn imihrantaŭ z Pakistana — staŭ trecim u historyi meram Łondana i pieršym musulmaninam na hetaj pasadzie.
***
Sadyk Chan — musulmanin, imihrant z Pakistana, adzin z vaśmi dziaciej siamiejnaj pary, jakaja pryjechała ŭ Brytaniju ŭ 60-ch hadach minułaha stahodździa.
Jaho bližejšy supiernik Zak Hołdśmit pakul nabiraje 35% hałasoŭ. Uličvajučy, što bolšaść hałasoŭ ŭžo padličana, hetaja roźnica naŭrad ci źmienicca.

Jaŭka vybarščykaŭ skłała 45%, što na 7% bolš, čym padčas papiarednich vybaraŭ mera ŭ 2012 hodzie.
Na pasadu mera Łondana bałatavalisia jašče dziesiać čałaviek.
Mer Łondana kantraluje niekalki asnoŭnych śfier ŭ stalicy — transpart, palicyju, navakolnaje asiarodździe, žyllo i haradskoje płanavańnie.
Mer Łondana — pasada, zasnavanaja ŭ 2000 hodzie ŭradam Toni Błera. Jon adnaviŭ instytut Rady vialikaha Łondana, jaki byŭ skasavany Marharet Tetčer.
Mer abirajecca terminam na čatyry hady, pryčym abiracca moža stolki razoŭ, kolki zachoča.
Vystupajučy ŭ Šefiłdzie, lidar brytanskich lejbarystaŭ Džeremi Korbin skazaŭ, što kandydat ad kansiervataraŭ Zak Hołdśmit byŭ uciahnuty ŭ kampaniju pa dyskredytacyi Sadyka Chana, sprabujučy supastavić jaho z ekstremistami. Takaja taktyka, pavodle Korbina, vyjšła bokam dla Hołdśmita i tolki dapamahła Chanu abyści svajho supiernika.
Kamientary