«Ja vinavaty, ale ja nie złačynca». Bieražkoŭ raspavioŭ pra toje, što vymusiła jaho pajści na parušeńni

Vyzvaleny ź SIZA KDB były hałoŭny redaktar «Priessboła» i eks-hienmieniedžier CHK «Dynama-Minsk» Uładzimir Bieražkoŭ u intervju mižnarodnamu miedyjaprajektu «Nastojaŝieje vriemia» prakamientavaŭ pierachod na pracu ŭ Biełaruski kłub bijatłonu i raspavioŭ pra toje, što śpiecyfika biełaruskaha zakanadaŭstva prymusiła jaho pajści na parušeńni ŭ pieryjad znachodžańnia ŭ kiraŭnictvie chakiejnaha kłuba.

Pavialičyć

Miesiac tamu Uładzimira Bieražkova vypuścili ź SIZA KDB pad padpisku ab niavyjeździe.

A niadaŭna kiraŭnik KDB Valeryj Vakulčyk, jaki ŭznačalvaje taksama Biełaruskuju fiederacyju bijatłona, zaprasiŭ Uładzimira Bieražkova na pracu pa damovie padradu ŭ Biełaruski kłub bijatłonu. Tam Bieražkoŭ budzie kuryravać stvareńnie Miedycynskaha centra pa reabilitacyi spartsmienaŭ.

— Apieracyi atletam u nas u Biełarusi tak-siak rabić navučylisia, a voś reabilitacyju mnohija vialikija spartsmieny prachodziać u zamiežnych klinikach — italjanskich, francuzskich, niamieckich. Płaciać za heta vialikija hrošy. My chočam stvaryć takija ŭmovy tut, — rastłumačyŭ Bieražkoŭ svaju zadaču na novym miescy pracy.

— Čamu taki adkazny abjekt — bijatłonny centr pa reabilitacyi spartsmienaŭ — davieryli mienavita vam, kali da hetaha vas padazravali ŭ parušeńni zakona?

— Nie mahu ciapier adkazać na vaša pytańnie. Mabyć, nie tolki ciapier, ale i naohuł. Nie mahu siabie aceńvać z punktu hledžańnia parušalnika albo nie parušalnika zakona. Jość viedańnie zakona i jość niaviedańnie. Ni toje, ni druhoje nie vyzvalaje ad adkaznaści. Kali ty niejkich rečaŭ nie viedaješ, ale ty pierastupiŭ hetuju rysu, to, naturalna, ty parušyŭ zakon.

Ja vinavaty ŭ šerahu rečaŭ, jakija mnie inkryminujucca, ale ja nie złodziej, ja nie kraŭ, u mianie nie było złoha namieru. Tym nie mienš, abstaviny, śpiecyfika zakanadaŭstva padšturchnuli mianie da taho, što ja parušyŭ šerah zakanadaŭčych aktaŭ. I farmalna da mianie pavinny i mohuć być pretenzii. U hetym sensie ja pryznaju svaju vinu. Ja nie złodziej, tamu, vidać, tak acanili mianie z boku maje novyja pracadaŭcy.

U mianie było šmat prapanoŭ. Kali kahości nie nazavu, to kahości pakryŭdžu. Byli prapanovy z tenisa, chakieja, prapanovy ad kłubaŭ KCHŁ. Ale ja nie mahu razhladać ich siońnia ŭ siłu taho, što maja praca nie moža być źviazana z kamandziroŭkami.

— Vy vopytny spartyŭny mieniedžar, dla jakoha sport — heta nie ideałohija, a paradak pryniaćcia važnych biźnies-i imidžavych rašeńniaŭ. Vaša prafiesijnaje asiarodździe hatova ŭsprymać takich ludziej, jak vy?

- Dumaju, što tak, kali ŭžo prapanova adbyłasia. Jana była davoli niečakanaj. Heta raz. Pa-druhoje, davajcie nie budziem razhladać heta jak niejkaje pryznačeńnie. Jość damova padradu na pieralik vyznačanych dziejańniaŭ. U tym liku na hety startap u vyhladzie miedycynskaha centra.

Jość vialikaje žadańnie pracavać, ale damova heta zaklučana na try miesiacy. Paśla čaho baki, u tym liku i ja, vyrašać, ruchacca nam dalej razam albo heta supracoŭnictva skončycca. Nie mahu skazać, što z hetaha momantu adbyŭsia moj kančatkovy pierachod u bijatłon. Heta nie praŭda.

Spadziajusia, što niejkaja jasnaść nastupić u kancy maja. Budzie jašče raz zasiadać kamisija pry prezidencie i razhladać majo chadajnictva ab vyzvaleńni ad kryminalnaj adkaznaści. Usie ruchajecca ŭ tym kirunku, kab hetaje chadajnictva było pryniata. Ja vykanaŭ usie ŭmovy, kampiensavaŭ škodu i čakaju, što rašeńnie budzie stanoŭčym.

— Z kim vy chočacie pracavać?

— Ja chaču pracavać z prafiesijanałami. Užo pačaŭ hetuju pracu, baču vakoł siabie ludziej nieabyjakavych, jarkich.

— A z kim nikoli nie staniecie pobač?

- Z padlukami, ź niahodnikami. Tut dźvie častki adkazu. Pieršaja — ja usim daravaŭ i nikomu nie žadaju zła. Druhaja — prafiesijnaja dziejnaść 00 heta niešta inšaje, i navat kali ja kahości daravaŭ, to pracavać ź im nie budu.

- Pra što vy zaraz marycie?

- Maru ab tym, kab jak maha bolš dzion pražyć, jak maha bolš śvitankaŭ sustreć, kab ptuški śpiavali, kab mianie atačali blizkija mnie ludzi, siabry. Kab ź imi ničoha nie zdaryłasia.

Toje, što zdaryłasia sa mnoj … Čałaviek — nie žyvioła, jon pryvykaje da ŭsiaho. A voś toje, što adčuvajuć blizkija ludzi, siamja - heta vielmi turbuje dušu. A ź niespakojnaj dušoj žyć vielmi składana …

• 0
• 0
• 0
• 0
• 0
• 0
• 0
• 0