U siabra Pucina Rałduhina znajšoŭsia jašče adzin afšor

U fajłach «Panamskaha archiva» źmiaščajecca infarmacyja ab afšornych firmach, jakija naležać ludziam z akružeńnia prezidenta Rasii Uładzimira Pucina.

Jak infarmuje Slon.ru, pra heta śviedčać dadzienyja, apublikavanyja Mižnarodnym kansorcyumam žurnalistaŭ-śledčych (ICIJ).

U archivie ŭtrymlivajecca infarmacyja ab niekalkich kampanijach, zarehistravanych na siabra rasiejskaha lidara, vijałančelista Siarhieja Rałduhina, u pryvatnaści, Raytar Limited (Brytanskija Virhinskija vyspy), pra jakuju raniej nie było viadoma.

Taksama byli apublikavanyja dadzienyja ab zarehistravanych na Brytanskich Virhinskich vyspach firmach, jakija naležać biznesmienam Ratenbierham. Za Barysam Ratenbierham zamacavana Kenrick Overseas Ltd., Culloden Properties Limited i Highland Ventures Group Limited. Na imia Arkadzia Ratenbierha zarehistravanyja kampanii Breckenridge Global Management Limited, Beechwood Associates Inc. i Causeway Consulting Limited. Synu Arkadzia Ratenbierha Iharu naležyć firma Stormont Systems Limited.

Na imia kiraŭnika departamienta transpartu Maskvy Maksima Liksutova, zhodna z archivam, zarehistravanaja firma Sermolent Equities Inc. Jurysdykcyja kampanii nie ŭdakładniajecca. Raniej u departamiencie zajaŭlali, što infarmacyja ŭ «Panamskim archivie» nie adpaviadaje rečaisnaści i namieśnik mera Maskvy nie źjaŭlajecca bienieficyjaram afšornych kampanij. Zhodna z dekłaracyjaj Liksutova, za 2015 hod jon zarabiŭ 65,9 miljonaŭ rubloŭ.

U toj ža čas u bazie dadzienych «Panamskaha archiva» niama infarmacyi ab firmie fihurystki Taćciany Naŭka, žonki pres-sakratara Pucina Dźmitryja Piaskova. Raniej sa spasyłkaj na dakumienty, apublikavanyja ICIJ, paviedamlałasia, što na spartsmienku zarehistravanaja afšornaj kampanija Carina Global Assets Ltd., jakaja taksama znachodzicca ŭ jurysdykcyi Brytanskich Virhinskich vyspaŭ. Paśla vychadu publikacyi Piaskoŭ raskryŭ majomaść žonki ŭ dekłaracyi i abvierh dadzienyja ŚMI, adznačyŭšy, što heta stavić pad sumnieŭ dakładnaść usioj infarmacyi ICIJ.

Siarhiej Rałduhin sapraŭdy zajmajecca pradprymalnictvam, paviedamlaŭ Pucin, ale zarablaje nievialikija hrošy, na jakija kuplaje muzyčnyja instrumienty dla muzyčnych ustanoŭ Rasii. U Kramli padkreślivali, što ŭsie apieracyi firmaŭ muzykanta zakonnyja, i zaklikali žurnalistaŭ pavažać jaho pryvatnaje žyćcio. Paźniej ŚMI pryjšli da vysnovy, što kampanija Rałduhina International Media Overseas S.A. atrymała srodki za prodaž akcyj «Rośniefti», prapažu jakich vyjaviŭ juryst Hermitage Capital Siarhiej Mahnicki.

Dakumienty «Panamskaha archiva» naležać Panamskaj jurydyčnaj kampanii Mossack Fonseca. Krynica, jakaja raskryła infarmacyju ab pracy firmy, raniej zajaviła, što chacieła pakarać kampanii, jakija śviadoma parušajuć zakon. U pačatku krasavika, u ramkach rasśledavańniaŭ, zasnavanych na apublikavanaj infarmacyi, žurnalisty raspaviali ab kampanijach, jakija naležać členam siemjaŭ suśvietnych lidaraŭ.

• 0
• 0
• 0
• 0
• 0
• 0
• 0
• 0