24-hadovy mahiloŭski pryzyŭnik Alaksandr Burakoŭ zajaviŭ ab niemahčymaści prachodzić słužbu ŭ vojsku pa stanie zdaroŭja i admaŭlajecca prynosić vajskovuju prysiahu.
Fota Radyjo Svaboda
Rašeńnie ab pryzyvie Burakova na terminovuju vajskovuju słužbu pryniała 24 krasavika Mahiloŭskaja haradskaja pryzyŭnaja kamisija (HPK), pryznaŭšy jaho abmiežavana hodnym, choć raniej jon pryznavaŭsia časova nie hodnym da słužby ŭ armii. U maładoha čałavieka, zhodna ź miedycynskim dyjahnazam, hipiermabilnaść sustavaŭ, dvuchbakovaja padoŭžnaja płoskastupniovaść I stupieni, druhasnyja recydyvirujučyja sinavity kalennych sustavaŭ, a taksama funkcyjanalnaja hipierbilirubiniemija.
Pavodle śćviardžeńnia pryzyŭnika, samoha pasiadžeńnia haradskoj pryzyŭnoj kamisii nie było. «Jak bačna z vydadzienaj mnie kopii, u składzie HPK adsutničaje ŭrač Časnakoŭ H.M., jaki kiravaŭ i kiruje pracaj uračoŭ-śpiecyjalistaŭ pa miedycynskim ahladzie hramadzian, jakija padlahajuć pryzyvu na terminovuju vajennuju słužbu, słužbu ŭ reziervie, a taksama adsutničaje sakratar HPK», — skazaŭ Burakoŭ, jaki nie byŭ zaprošany na pasiadžeńnie haradskoj kamisii, niahledziačy na vykazanaje raniej žadańnie.
Druhoj pryčynaj admovy ad prachodžańnia słužby pryzyŭnik nazyvaje nie lehitymnaść znachodžańnia va ŭładzie Alaksandra Łukašenki, jaki źjaŭlajecca taksama viarchoŭnym hałoŭnakamandujučym. Burakoŭ nie pryznaje vyniki prezidenckich vybaraŭ, spasyłajučysia na adpaviednyja vysnovy šerahu naziralnikaŭ.
Pryzyŭnik abskardziŭ rašeńnie haradskoj kamisii, adnak siońnia Mahiloŭskaja abłasnaja pryzyŭnaja kamisija paćvierdziła dumku kaleh nižejšaj instancyi, paviedamiŭ BiełaPAN vajenny kamisar Mahiloŭskaj vobłaści Alaksandr Haroškin. Pavodle jaho słoŭ, siońnia Burakoŭ nie havaryŭ pra palityčnyja pohlady. «Jon ŭpiraŭ na stan zdaroŭja», — skazaŭ vajenny kamisar.
U svaju čarhu Burakoŭ raspavioŭ, što abłasnaja kamisija vyrašyła pravieryć fakt praviadzieńnia pasiadžeńnia haradskoj kamisii. «Jany skazali, što ja, jak hramadzianin, mieŭ prava patrabavać, kab mianie paklikali na pasiadžeńnie i prysutničać tam asabista», — adznačyŭ pryzyŭnik.
Pavodle słoŭ Alaksandra Burakova, siońnia ž jon atrymaŭ pozvu na słužbu ŭ vajskovuju čaść 18662 transpartnych vojskaŭ, dzie, jak jon śćviardžaje, spasyłajučysia na abłasnuju kamisiju, jamu nie treba budzie prynosić prysiahu. «Ź im budzie pracavać pradstaŭnik vajskovaj čaści, jon jamu ŭsio na miescy rastłumačyć, što jon maje, što nie maje», — skazaŭ u svaju čarhu Haroškin. «Jany buduć razhladać jaho dakumienty, buduć ź im hutaryć i buduć vynosić rašeńnie — padychodzić jon im ci nie padychodzić», — paviedamiŭ vajenkam, adznačyŭšy, što kali čaść admovicca ad Burakova, to jon «budzie pryzvanym, ale nie adpraŭlenym».
Razam z tym Burakoŭ nie zhodny z dumkaj vajennych čynoŭnikaŭ ab mahčymaści prachodžańnia im słužby ŭ vojsku i maje namier, zhodna z zakonam, u dziesiacidzionny termin abskardzić rašeńnie abłasnoj pryzyŭnoj kamisii ŭ sudzie.
