Zvyčajny, na pieršy pohlad, łot źjaviŭsia na sajcie «Homielabłmajomaści». Pradajecca žyły cahlany dom płoščaj 150 kv. mietraŭ pa adrasie: Praletarskaja, 36. Na fota — znakamity dom byłoha mera Homiela Viktara Pilipca.
Fota: «Homielabłmajomaść»
U domie, raźmieščanym u histaryčnym centry Homiela, pobač z pałacam Rumiancavych-Paskievičaŭ, były mer sa svajoj siamjoj paśpieŭ pažyć da svajho źniavoleńnia niekalki hadoŭ. U vieraśni 2012 hoda Viktara Pilipca ŭziali pad vartu, a 22 krasavika 2014-ha Mahiloŭski abłasny sud pryznaŭ jaho vinavatym u złoŭžyvańni ŭładaj i słužbovymi paŭnamoctvami.
Były mer Homiela razam z saŭdzielnikami niezakonna raźmierkavali pamiž saboj, svaimi svajakami, blizkimi i znajomymi 27 kvater u šmatkvaternych žyłych damach. Jamu pryznačyli pakarańnie ŭ vyhladzie pazbaŭleńnia voli terminam na piać hadoŭ z kanfiskacyjaj majomaści, z pazbaŭleńniem prava zajmać pasady, źviazanyja z vykanańniem arhanizacyjna-rasparadčych i administracyjna-haspadarčych abaviazkaŭ, terminam na piać hadoŭ, z adbyvańniem pazbaŭleńnia voli ŭ papraŭčaj kałonii va ŭmovach uzmocnienaha režymu. 19 vieraśnia 2015 hoda Pilipiec byŭ vyzvaleny pa amnistyi.
Na sajcie fondu «Homielabłmajomaść» pryvodziacca nastupnyja źviestki ab abjekcie: adnapaviarchovy błočny, ablicavany cehłaj žyły dom sa sklepam, cieniavym padstreškam, dvuma hankami, płotam, bramkaj, bramaj, dvarovym pakryćciom, ahulnaja płošča pa SNB 214,9 kv. m, ahulnaja płošča žyłoha pamiaškańnia 150 kv. m, žyłaja płošča 90,8 kv. m, kolkaść žyłych pakojaŭ — 4, inv. № 350/S-111729; zbudavańnie śpiecyjalizavanaje vodahaspadarčaha pryznačeńnia — kanalizacyjnaja sietka z trubapravodam bieznapornym, trubapravodam napornym, kałodziežam, kamieraj, pompavaj stancyjaj.
Ziamielny ŭčastak płoščaj 0,1031 ha pradastaŭlajecca ŭ arendu terminam na 99 hadoŭ.
Pačatkovy košt pradmieta aŭkcyjonu — 4 541 137 661 rubloŭ. Heta pa ciapierašnim kursie kala 237 tys. dalaraŭ. Aŭkcyjon adbudziecca 2 červienia.
