Biełteleradyjokampanija abjaviła ab pačatku nacyjanalnaha adboračnaha tura na dziciačaje «Jeŭrabačańnie-2016», paviedamili ŭ pres-słužbie miedyjachołdynha.
Pryjom zajavak dla ŭdziełu ŭ nacyjanalnym adboračnym tury dziciačaha konkursu pieśni «Jeŭrabačańnie-2016», jaki projdzie 20 listapada na Malcie ŭ horadzie Valeta, adkryty. Adbor pravodzicca ŭ adpaviednaści z Pałažeńniem, raspracavanym arhanizataram, i praviłami konkursu, jakija ŭstanaŭlivajucca Jeŭrapiejskim viaščalnym sajuzam.
Arhanizataram nacyjanalnaha adboračnaha tura źjaŭlajecca Biełteleradyjokampanija.
Sioleta JEVS unios niekatoryja źmieny ŭ praviły dziciačaha konkursu pieśni «Jeŭrabačańnie». Adpaviedna novaŭviadzieńni lahli i ŭ asnovu pałažeńnia ab nacyjanalnym adboračnym tury.
Udzieł u adbory mohuć uziać junyja vykanaŭcy, jakim na datu praviadzieńnia mižnarodnaha konkursu (20 listapada) pavinna być nie mienš za 9 i nie bolš za 14 hadoŭ, jakija źjaŭlajucca hramadzianami Respubliki Biełaruś, albo zamiežnymi hramadzianami i asobami biez hramadzianstva, jakija pastajanna pražyvajuć na terytoryi Biełarusi nie mienš za dva z pałovaj hady.
Pieśnia (muzyka i (abo) tekst), aranžyroŭka pieśni mohuć być stvoranyja jak samim udzielnikam, tak i inšymi asobami. Jak rastłumačyli ŭ pres-słužbie, raniej dzicia abaviazana było być aŭtaram albo saaŭtaram słoŭ ci muzyki, ciapier jano prosta pavinna brać udzieł u stvareńni pieśni, pakolki i ŭ papiarednija hady ŭ praviłach pakazvałasia, što «pry stvareńni tekstu, muzyki, aranžyroŭki pieśni dapuskajecca akazańnie dapamohi prafiesijanałami ŭ halinie muzyki i inšymi asobami».
U adbory moža ŭdzielničać pieśnia, jakaja składajecca ź vieršaŭ na biełaruskaj i/abo ruskaj movie z vykarystańniem zamiežnaj movy (ale nie bolš za 25% abjomu tekstu) i muzyki, jakija nie byli kamiercyjna realizavanyja, a taksama vykananyja publična da 1 maja 2016 hoda.
Udzielnik adboru abo zakonny pradstaŭnik kankursanta, jaki nie dasiahnuŭ uzrostu 14 hadoŭ, pavinien być adzinym pravaŭładalnikam pieśni, albo mieć sumiesnaje prava vałodańnia pieśniaj, kali ŭ adbory biare ŭdzieł kalektyŭ vykanaŭcaŭ.
Dla ŭdziełu ŭ adboračnym tury zajaŭku treba kaštoŭnaj banderollu nakiravać na adras: 220807, h.Minsk, vuł. Makajonka, 9, z pamietkaj «Na dziciačy konkurs pieśni «Jeŭrabačańnie-2016». Apošni dzień adpraŭki banderolaŭ z zajaŭkami — 17 červienia 2016 hoda.
Pałažeńnie ab praviadzieńni nacyjanalnaha adboru dziciačaha konkursu pieśni «Jeŭrabačańnie» raźmieščana na aficyjnym sajcie Biełteleradyjokampanii ŭ raździele «Prajekty».
Pa vynikach adboračnaha tura, jakija buduć padviedzienyja nie paźniej za 1 lipienia, prafiesijnaje žury vyznačyć ad siami da dziesiaci kankursantaŭ dla ŭdziełu ŭ finale. Finalny hała-kancert płanujecca pravieści nie paźniej za 16 vieraśnia. Pieramožca nacyjanalnaha adboračnaha tura, jaki pradstavić Biełaruś na dziciačym «Jeŭrabačańni-2016», vyznačajecca pa vynikach hałasavańnia prafiesijnaha žury i telehledačoŭ.
Usie pravy, jakija adnosiacca da praviadzieńnia adboru, naležać vyklučna arhanizataru — Biełteleradyjokampanii. Ekskluziŭnym viaščalnikam jak nacyjanalnaha adboračnaha tura, tak i mižnarodnaha dziciačaha konkursu pieśni «Jeŭrabačańnie-2016» tradycyjna vystupić telekanał «Biełaruś 1».
Biełaruś udzielničaje ŭ mižnarodnym dziciačym konkursie pieśni «Jeŭrabačańnie» z momantu jaho zasnavańnia — z 2003 hoda. Pieršaj biełaruskaj udzielnicaj muzyčnaha forumu stała Volha Saciuk. Na rachunku našaj krainy dźvie pieramohi: u 2005 konkurs vyjhrała Ksienija Sitnik ź pieśniaj «My razam», u 2007-m — Alaksiej Žyhałkovič z kampazicyjaj «Ź siabrami». Letaś Rusłan Asłanaŭ ź pieśniaj «Čaraŭnictva» zaniaŭ čaćviortaje miesca.
