Pavodle niepaćvierdžanaj infarmacyi, jon skončyŭ žyćcio samahubstvam. Jak padzialiłasia z karespandentam «Salidarnasci» jaho siabroŭka Aksana Sidorskaja, dačka eks-premjera Biełarusi, pachavańnie Dziahciaryka adbuducca ŭ čaćvier.
Jak stała viadoma «Salidarnasci», viadomy biznesmen i, jak rehularna jaho charaktaryzavali śvieckija chranikiory, — jarki piersanaž u tusoŭkach Minska Jaŭhien Dziahciaryk pakončyŭ z saboj 24 traŭnia. Što pasłužyła pryčynaj suicydu, pakul nieviadoma.
— Ja nie mahu skazać dakładna, što adbyłosia — nad hetym pracujuć śledčyja orhany. Ale tak, Jaŭhiena bolš niama. Heta adbyłosia ŭčora, — raspaviała ŭ sieradu «Salidarnasci» siabroŭka biznesmiena Aksana Sidorskaja, dačka eks-premjera Biełarusi Siarhieja Sidorskaha. — U niadzielu jon adznačaŭ dzień naradžeńnia, byŭ u dobrym nastroi, prymaŭ vinšavańni doma, u horadzie… My ŭsie ŭ šoku ad taho, što adbyłosia. Heta nie padobna na jaho. Ale, značyć, takim było jaho rašeńnie.
Jak paviedamiła surazmoŭca, pachavańnie Jaŭhiena Dziahciaryk adbudziecca ŭ čaćvier.
Žonka biznesmiena Nastaśsia Łahoda źjaŭlajecca ŭłaśnicaj sietki multybrendavych bucikaŭ «Kabuki». Pa adnym z numaroŭ telefonaŭ mahazinaŭ «Salidarnasci» adkazali, što nie mohuć dapamahčy źviazacca z kiraŭnictvam u suviazi z trahičnymi padziejami. Ad kamientaroŭ na inšym kancy provada tam ustrymalisia.
U Śledčym kamitecie vyśvietlić padrabiaznaści trahiedyi pakul nie ŭdałosia.
* * *
Jaŭhien Dziahciaryk, akramia «Kabuki», taksama byŭ viadomy jak uładalnik staličnaha kafe «Bazilik». Jon pačynaŭ karjeru tokaram na zavodzie, zatym niekalki hadoŭ prapracavaŭ administrataram u fiłarmonii i arhanizataram kancertnych prahram. Biźniesam zaniaŭsia «dla dušy», adkryŭšy nievialikaje kafe. Zachaplaŭsia tenisam.
— My prosta atrymlivajem zadavalnieńnie ad taho, što jano kormić ludziej i prynosić nievialiki prybytak, — raspaviadaŭ biznesmien niekalki hadoŭ tamu ŭ intervju časopisu «Alo, MTS».
Taksama pradprymalnik zhadvaŭ pra toje, što ludzi «iduć u biznes» ad bieznadziejnaści.
— Kali b mnie, jak tokaru, płacili dastatkova dla narmalnaha isnavańnia, zastaŭsia b na zavodzie. Vyjšaŭ z pracy i zabyŭsia, što tam adbyłosia. Ruki admyŭ — usio ŭ ciabie dobra ŭ žyćci, i nie treba dumać pra zaŭtrašni dzień. U biznesie tak nie byvaje.
…Čałaviek, jaki zajmajecca biznesam, u jaho nie byvaje vychodnych, i hałava nikoli nie adklučajecca. Jon uvieś čas znachodzicca ŭ stanie napružańnia, tamu što biznes — heta toje, ad čaho zaležyć jaho žyćcio, jaho dabrabyt i naohuł usio. Luby čałaviek, jaki surjozna zajmajecca biznesam, rassłablajecca vielmi redka…
…Kožny ličyć, što kryzis na im adbiŭsia bolš, čym na inšych. Pytańnie ŭ tym, jakaja za hetym budzie reakcyja. Adzin viadomy palityk skazaŭ, što kryzis dazvolić nam acanić svaje mahčymaści. I jon maje racyju. U stresavaj situacyi čałaviek ździajśniaje albo pravilnyja, albo niapravilnyja ŭčynki. A potym aceńvaje vynik svaich dziejańniaŭ, viadoma, kali jon čałaviek razumny. Zaraz pryjšoŭ čas rabić učynki, prajavić usio svajo majsterstva pa vyžyvańni ŭ chutkapłynnym asiarodździ, a nakolki daskanała kožny vałodaje hetym majsterstvam — pakaža čas.
