Padrychtoŭka vizitu papy Franciška ŭ Biełaruś viadziecca, ale heta nie aznačaje, što vizit adbudziecca ŭ bližejšy čas, zajaviŭ žurnalistam 27 maja ŭ Minsku ministr zamiežnych spraŭ Uładzimir Makiej.
cruxnow.com
Jon nahadaŭ pra toje, što padčas niadaŭniaha vizitu ŭ Vatykan Alaksandr Łukašenka zaprasiŭ papu Franciška naviedać Biełaruś.
«Ale padrychtoŭka i razmova pra heta nie aznačajuć, što vizit adbudziecca zaŭtra, ci paślazaŭtra, abo ŭ bližejšyja dni. Usie vizity dziaržaŭnaha ŭzroŭniu patrabujuć dbajnaj padrychtoŭki», — dadaŭ Makiej.
Pry hetym jon padkreśliŭ, što adnosiny Biełarusi z Vatykanam znachodziacca na vysokim uzroŭni. «My sapraŭdy ŭdziačnyja za strymanuju i ŭzvažanuju pazicyju Vatykana, u tym liku ŭ pytańni skasavańnia abmiežavalnych mier z boku Jeŭrasajuza», — skazaŭ kiraŭnik biełaruskaha MZS. Taki ŭzrovień uzajemaadnosin budzie zachavany i ŭ dalejšym, zajaviŭ Makiej.
«Što tyčycca vizitu papy ŭ Biełaruś, to my hatovyja jaho pryniać i arhanizavać jaho sustreču na biełaruskaj ziamli. Hety vizit i hetaja sustreča dapamohuć stvaryć jašče bolšuju harmoniju i jašče bolšy mir. Z hetaj pazicyi my i budziem padychodzić pry arhanizacyi dadzienaha vizitu. Pakul havorka pra dakładnuju datu nie idzie, ale padrychtoŭka viadziecca», — paŭtaryŭ kiraŭnik źniešniepalityčnaha viedamstva.
Nahadajem, sustreča Łukašenki z pantyfikam adbyłasia 21 maja ŭ Vatykanie. Paśla aŭdyjencyi biełaruski kiraŭnik raspavioŭ žurnalistam, što papa Francišak pahadziŭsia z tym, što jamu para pryjechać u Biełaruś. «Jon vielmi dobra viedaje stanovišča ŭ našaj krainie, dobra viedaje pra mižkanfiesijnuju zhodu, jakaja panuje ŭ nas, pra situacyju ŭ sacyjalnaj śfiery, ekanomicy», — skazaŭ Łukašenka.
Jon taksama vykazaŭ dumku, što papu para sustrecca na biełaruskaj ziamli z patryjarcham Ruskaj pravasłaŭnaj carkvy. «Usio ŭ rukach Hospada: kali jon dabrasłavić, to našy vyšejšyja ijerarchi katalickaj i pravasłaŭnaj cerkvaŭ sustrenucca na biełaruskaj ziamli. Dumaju, što zaprosiać tudy i pradstaŭnikoŭ musulmanskaha śvietu, i judejaŭ, i inšych kanfiesij», — skazaŭ jon. Takaja sustreča ŭ Biełarusi mahła b sadziejničać miratvorčamu pracesu na Danbasie, dadaŭ Łukašenka.
Varta adznačyć, što padčas Nacyjanalnaha eŭcharystyčnaha kanhresa, jaki prajšoŭ 24-26 maja ŭ Hrodnie, papski lehat kardynał Zianon Hrachaleŭski zajaviŭ žurnalistam: adnoj z umoŭ, nieabchodnych dla pryjezdu papy Franciška ŭ Biełaruś, źjaŭlajecca daśviedčanaść. Da pryjezdu pantyfika ŭ Biełaruś Vatykan pavinien daviedacca pra ŭsie prablemy kaścioła ŭ krainie, rastłumačyŭ kardynał. «Ja viedaju, što ŭ Biełarusi, jak i ŭ kožnaj krainie, časam zdarajucca ciažkaści, ale ich nie treba zamoŭčvać, a kazać jak jość — praŭdu», — skazaŭ Hrachaleŭski.
