Tradycyjnyja «Džazavyja suboty z «Bankam BiełVEB» adkryjucca 11 červienia na staličnaj płoščy Svabody ŭ Vierchnim horadzie.
Džazavy viečar 6.06.2015
Akramia biełaruskich muzykantaŭ na praciahu troch červieńskich viečaroŭ pierad minskaj publikaj vystupiać zorki suśvietnaha džazu z Hiermanii, Italii, Polščy, Rumynii, ZŠA i Francyi, paviedamiła 1 červienia na pres-kanfierencyi ŭ Minsku dyrektar mižnarodnaha fondu «Ideja» Natalla Kucan.
Jak adznačyŭ dyrektar kancertnaha ahienctva «Ekvilibryum Arts» Zachar Dudzinski, meta i admietnaja rysa fiestyvalu — nablizić džaz da ludziej.
11 červienia na płoščy Svabody vystupić amierykanski vakalist, jakoha nazyvajuć najiaskraviejšym adkryćciom džazavaj Amieryki, Sačał Vasandani. Dalej na scenu vyjduć polskija muzyki — Miečysłaŭ Ščeśniak i trya vybitnaha pijanista Kšyštafa Chierdyna. Zavieršać viečar metry biełaruskaha džazu hrupa Apple Tea.
Džaz-band Arkiestra vajenna-pavietranych sił ZŠA ŭ Jeŭropie adkryje druhuju džazavuju subotu 18 červienia. U hety viečar taksama vystupiać brytanski muzykant Ien Šou, jaki dvojčy atrymaŭ BBC Jazz Awards za lepšy vakał, i talenavitaje biełaruskaje trya Kanstancina Haračaha. Pry kancy zapłanavany vystup franka-niamieckaha dueta pijanista Bažana Zi i trambanista Nilsa Vohrana.
Viečar 25 červienia pačnie rumynskaja zorka Alena Mindru. Dalej na scenie vystupiać 13 muzykaŭ džazavaha arkiestra Veneto ź Italii i trya Anatola Tarana, čatyrochrazovaha ŭładalnika hran-premii prezidenta Biełarusi.
Na pytańnie žurnalistaŭ, kolki kaštuje arhanizavać taki fiestyval, namieśnik staršyni praŭleńnia AAT «Bank BiełVEB» Aleh Procharčyk adznačyŭ: «Peŭnuju sumu nazvać ciažka, bo na praciahu ŭsiaho času padrychtoŭki da fiestyvalu pastajanna viaducca pieramovy i ŭzhadnieńni. Skažu adno — vielmi doraha. Heta arenda placoŭki, muzyčnaha abstalavańnia, arhanizacyja achovy i hetak dalej, nie kažučy ŭžo pra hanarary zaprošanych zorak. Adnak, kali kožny robić svoj uniosak, stanovicca trochi tańniej, mnohija dajuć skidki, iduć na sastupki».
Sioleta arhanizatary abiacajuć akramia śpiecyjalna adviedzienych miescaŭ dla ludziej z abmiežavanymi mahčymaściami i viełaparkovak arhanizavać «čaroŭnuju chatku», dzie buduć rychtavacca małočnyja fruktovyja kaktejli, a maładyja baćki zmohuć skarystacca spavivalnym stolikam. Taksama padčas fiestyvalu na płoščy Svabody budzie pracavać kulinarny błok Vulitsa.Ezha.
Što tyčycca mier biaśpieki, pavodle słoŭ Kucan, u adroźnieńnie ad minułaha hoda, kali ich ŭzmacnieńnie było pradyktavanaje vizitam u Biełaruś mitrapalita Kiryła, zaraz achova budzie arhanizavanaja «ŭ štatnym režymie».
Akramia taho, aŭkcyjon dabračynnych sustreč «MajeSens» abviaściŭ pra ŭnikalnuju mahčymaść asabista paznajomicca i prabavić čas z zorkami suśvietnaha džazu. Razyhryvajucca sustrečy ź Ienam Šou, Sačałam Vasandani i Alenaj Mindru. Staŭki možna zrabić na sajcie maesens.by. Atrymanyja srodki buduć nakiravanyja na padtrymku inicyjatyvy dapamohi nievylečna chvorym dzieciam «Hałoŭnaje žadańnie», u pryvatnaści na kuplu aparata štučnaj vientylacyi lohkich dla dziaŭčynki z Hrodna.
Arhanizatary kancertaŭ — mižnarodny sacyjalna-ekanamičny fond «Ideja» pry padtrymcy Minharvykankama. Hienieralny partnior prajekta — AAT «Bank BiełVEB».
Pačatak usich viečaroŭ u 20.00. Uvachod biaspłatny.
