U chodzie kontrterarystyčnaj apieracyi ŭ kazachstanskim Aktabe (horad na zachadzie krainy) byli zabityja čatyry čałavieki, što napali na vajskovuju častku i zładzili pierastrełku z palicyjaj, paviedamlaje ŭ niadzielu «Interfaks» sa spasyłkaj na pres-sakratara MUS Kazachstana Ałmasa Sadubajeva.
Jon raspavioŭ, što siamiora napadnikaŭ byli zatrymanyja, ź ich dvoje atrymali ranieńni. Astatnija mierkavanyja złačyncy adšukvajucca.
Sadubajeŭ udakładniŭ, što raniej u niadzielu hrupa čałaviek napała na zbrojnuju kramu «Pałada», dzie zabiła pradaŭca i achoŭnika kramy. U chodzie pierastrełki z palicejskimi hrupa ludziej naniesła ranieńni traim pravaachoŭnikam.
Pry napadzie na druhuju zbrojnuju kramu «Pantera» byŭ zabity adzin naviednik kramy, i jašče adzin mirny žychar byŭ paranieny. Pravaachoŭniki zastrelili traich napadnikaŭ.
Jašče adzin napadnik byŭ zabity ŭ chodzie ataki na vajskovuju častku.
«Dla napadu na vajskovuju častku złačyncy zachapili maršrutny aŭtobus, vysadzili kiroŭcu i pasažyraŭ, a zatym aŭtobusam prataranili varoty, dzie, prakraŭšysia na terytoryju, adkryli stralbu, zabiŭšy troch, i paraniŭšy šaściarych vajskoŭcaŭ», - raspavioŭ Sadubajeŭ.
Raniej u niadzielu paviedamlałasia, što nieviadomyja, jakija mahli być datyčnyja da radykalnych relihijnych hrupovak, ździejśnili niekalki napadaŭ u Aktabe.