Śviet pabačyŭ zapis biełaruskamoŭnaj liturhii: biełaruskija hreka-kataliki vydali dysk «Śpievy Boskaj Liturhii śviatoha Jana Załatavusnaha». Taksama zapis užo dastupny dla prasłuchoŭvańnia anłajn.
Pavodle słovaŭ biełaruskaha hreka-katalickaha śviatara z Łondana a. Siarhieja Stasieviča, jaki taksama spryčyniŭsia da realizacyi hetaha muzyčnaha prajektu, kampakt-dysk, na jakim zapisana ŭsia śpiavanaja Boskaja Liturhija śviatoha Jana Załatavusnaha vizantyjska-biełaruskaha abradu, vychodzić u Biełarusi ŭpieršyniu. Dysk byŭ zrobleny na studyi Kava Records.
«Hety zapis Boskaj Liturhii sa śpievami na biełaruskaj movie maje najpierš adukacyjnyja mety, — adznačaje śviatar. — Jon pavinien dapamahčy viernikam Biełaruskaj Carkvy navučycca śpiavać na niadzielnaj bahasłužbie».
Liturhičnyja śpievy, zapisanyja na dysku, vykanali Nasta Kazaroviec (alt), Andrej Hajdukievič i Siarhiej Rajuniec (tenary) dy Arciom Sitnikaŭ (bas, čytalnik), a śviatarskija častki — ajciec Jaŭhien Usošyn.
Na praciahu troch hadoŭ nad hetym zbornikam carkoŭnych śpievaŭ pracavaŭ Siarhiej Rajuniec, jaki kampanavaŭ jaho, zapisvaŭ noty i harmanizavaŭ asobnyja muzyčnyja tvory, šukajučy i źviarajučy ich z aryhinałami.
Tradycyjnyja napievy i tvory viadomaha biełaruskaha kampazitara Mikoły Ravienskaha byli zapisanyja pavodle muzyčnych vydańniaŭ «Carkoŭny śpieŭnik» i «Śpievy Boskaj Liturhii», jakija byli vydadzienyja ŭ Łondanie pad redakcyjaj Haja Pikardy — muzykaznaŭcy ź Vialikabrytanii z francuzskimi karaniami, daśledčyka biełaruskaj kultury. Abychodny napieŭ — pavodle «Paleskaha zbornika» (1929).
Dysk «Śpievy Boskaj Liturhii śviatoha Jana Załatavusnaha» byŭ padorany papu Francišku. «Heta dar viernikaŭ Biełaruskaj Hreka-Katalickaj Carkvy, asabliva moładzi, jakija na rodnaj movie molacca za papu, za Katalickuju Carkvu dy za svaju Baćkaŭščynu Biełaruś, asabliva ŭ hetyja dni», — skazaŭ Archimandryt Siarhiej (Hajek) Śviatomu Ajcu.
Papa Francišak pieradaŭ svajo błasłavieńnie biełaruskim hreka-katalikam.
Nabyć dysk možna ŭ parafii śviatoha Jazepa ŭ Minsku (vuł. Ardžanikidze, 6).
Zapis taksama dastupny da prasłuchoŭvańnia ŭ internecie.
