Davydźka pra Dyńko: «Čałaviek vycier ruki ab abrus, plunuŭ u kalidory i syšoŭ»
«Takoje ŭražańnie, što čałaviek vycier ruki ab abrus, jašče plunuŭ u kalidory i syšoŭ», — tak vykazaŭsia kiraŭnik Biełdziaržteleradyjokampanii Hienadź Davydźka naŭzdahon udziełu ŭ pieradačy «Kłub redaktaraŭ» redaktara «Našaj Nivy» Andreja Dyńko.
Hnieŭ Hienadzia Davydźki vyklikała intervju, jakoje paśla ŭdziełu ŭ pieradačy Andrej Dyńko daŭ radyjo «Svaboda».
«Prahrama zbudavanaja takim čynam, što ŭdzielničać u joj ciažka. Siadziać čatyry čałavieki z peŭnaha łahiera i adzin čałaviek ź niezaležnaha vydańnia. Prahrama robicca dla taho, kab u taki chitry sposab prynižać, unosić raskoł, dyskredytavać niedziaržaŭnyja vydańni i apazicyjnych palitykaŭ. Tamu zadača pierad zaprošanym čałaviekam staić składanaja, — adznačyŭ u intervju Dyńko. — Čytaju vodhuki na internet-forumach i sacyjalnych sietkach — ludzi dziakujuć mnie i chvalać toje, jakim čynam ja adkazvaŭ, i tyja dumki, jakija ja tam vykazaŭ. Ludzi razumiejuć, što heta toje samaje, jak hulać u futboł adnamu suprać čatyroch».
«Razam z tym, ja liču, što jakimi b ni byli ciažkimi ŭmovy dla dyjałohu, vielmi važna, što chacia b u niejkich formach jon adbyvajecca. Chaj Davydźka pabačyć Dyńko ŭžyvuju i pačuje jaho mierkavańnie asabista», — adznačyŭ razam z tym Dyńko.
«Mnie spadabaŭsia Dyńko na našaj pieradačy», — zapiarečyŭ Davydźku redaktar «Sovietskoj Biełoruśsii» Pavieł Jakubovič. Ale Jakubovič narakaŭ, što hramadstva znachodzicca «ŭ raźjušanym stanie» i nie razumieje, što takoje kansalidacyja. Na jahonuju dumku, «Kłub redaktaraŭ» robić pravilnuju spravu, kali zaprašaje «ludziej inšaha koła».
Varta adznačyć, što ŭčora haściej ź niedziaržaŭnych ŚMI ŭ studyi «Kłuba redaktaraŭ» nie było. Havorka išła, naprykład, pra losavyznačalnaść budučaha Usiebiełaruskaha narodnaha schodu. «My ŭsie ciapier majem vielmi vialikuju patrebu va Usiebiełaruskim schodzie», — kazaŭ redaktar «Hrodzienskaj praŭdy».
Nahadajem, što na papiarednim tydni hościem «Kłuba redaktaraŭ» upieršyniu byŭ redaktar «Našaj Nivy». Adbyłasia žyvaja dyskusija. Voś videa toj prahramy.
Ciapier čytajuć
Łukašenka znoŭ apraŭdvaŭsia za hieorhijeŭskija stužki: hetym razam pierad rasijskim pasłom27
Kamientary