Navukoŭcy z Kiembrydžskaha univiersiteta vyśvietlili, što kielichi vialikaha pamieru mohuć zaachvocić ludziej pić bolš ałkaholu.
Getty
Pryčynaj hetaha moža być iluzija, što kolkaść śpirtnoha mienšaja, čym jość na samoj spravie, pieradaje Lenta.ru. Niadaŭni ahlad navukovych prac, vykanany mižnarodnaj arhanizacyjaj Cochrane Collaboration, pakazaŭ, što pamier i abjom posudu pavialičvaje spažyvańnie praduktaŭ charčavańnia i biezałkaholnych napojaŭ. Adnak padobny efiekt nie byŭ prademanstravany dla śpirtnoha.
Kab pravieryć, ci ŭpłyvaje na kolkaść vypitaha ałkaholu pamier kielichaŭ, navukoŭcy paviali daśledavańnie ŭ adnoj z kram śpirtnoha ŭ Kiembrydžy.
Krama pradaje vino, raźlitaje ŭ kielichi standartnym abjomam u 300 mililitraŭ. Adna porcyja napoju składaje 125 abo 175 mililitraŭ. Na praciahu 16 tydniaŭ uładalniki ustanovy mianiali pamier kielichaŭ raz na dva tydni, čarhujučy mały abjom (250 mililitraŭ), standartny i vialiki (370 mililitraŭ). Abjom samoha vina ŭ kielichu zastavaŭsia raniejšym.
Daśledčyki vyjavili, što štodzionny abjom nabytaha vina byŭ prykładna na 9,4% vyšejšy, kali śpirtnoje pradavałasia ŭ vialikich kielichach, čym u standartnych. Pry hetym kolkaść pradavanaha ałkaholu ŭ małych kielichach nie adroźnivałasia ad toj, što padavałasia ŭ standartnym abjomie. Navukoŭcy patłumačyli heta tym, što bolšy pamier posudu źmianiaje vizualnaje ŭsprymańnie kolkaści vina, prymušajučy ludziej dumać, što jany pjuć mienš čym zvyčajna.
Spažyvańnie ałkaholu źjaŭlajecca adnym z asnoŭnych faktaraŭ ryzyki raźvićcia takich zachvorvańniaŭ, jak cukrovy dyjabiet druhoha typu, rak i parušeńnie funkcyj piečani.
