Arhanizatary Siomaha fiestyvalu biełaruskamoŭnaj rekłamy i kamunikacyi aDNaK!, cyrymonija ŭznaharodžańnia jakoha adbudziecca 30 červienia ŭ Minsku, zapuskajuć «apošni vahon» padačy rabot. Jašče jość šaniec stać udzielnikam aDNaK!, bo dedłajn pryjomu rabot praciahnuty da 16 červienia (uklučna). Kali vy jašče vahajeciesia ci nie paśpiavajecie, pryvodzim 5 pryčyn, čamu treba ŭziać udzieł u Fiestyvali.
1. Kreatyŭnaja placoŭka
Fiestyval aDNaK! unikalny ŭ svajoj halinie. U Biełarusi niama anałahičnych mierapryjemstvaŭ, jakija b zajmalisia raźvićciom mienavita biełaruskamoŭnaj i biełaruskaaryjentavanaj rekłamy.
Ale Fiestyval aDNaK! – heta jašče i kreatyŭnaja placoŭka, dzie admysłoŭcy rekłamnaj haliny jak ź biźniesu, tak i z kulturnickich asiarodkaŭ abmieńvajucca dośviedam, a pačatkoŭcy jaho nabirajucca. Udzieł u Fiestyvali – vydatnaja mažlivaść trapić u abojmu najbolš prasunutych rekłamistaŭ, markietołahaŭ i dyzajnieraŭ, jakija zadajuć trend u krainie.
2. Prafiesijnyja krytery
Udzieł u Fiestyvali aDNaK! – heta jašče i vydatnaja mažlivaść atrymać abjektyŭnaje mierkavańnie pra svaju rabotu ad kampietentnaha žury,
jakoje sioleta abnaviłasia amal napałovu i składajecca jak z rekłamistaŭ, tak i ź viadomych publičnych asobaŭ i admysłoŭcaŭ u sumiežnych śfierach.
Asnoŭnyja krytery acenki rabot udzielnikaŭ:
– Adpaviednaść užyvańnia biełaruskaj movy metam i zadačam kamunikacyi.
– Jakaść kamunikacyi z metavaj/metavymi aŭdytoryjami.
– Praktyčnaja značnaść — nakolki vyrašanyja zadačy kamunikacyi.
– Najaŭnaść u rabocie aktualnaj (sučasnaj) vizualnaj kultury, aryhinalnaść raboty.
– Uzrovień techničnaha vykanańnia (realizacyi) raboty.
3. Biełarusaaryjentavanaść
Sioletniaja kancepcyja Fiestyvalu: «aDNaK!— hien biełaruskaha kreatyvu».
Ciaham usiaho svajho isnavańnia Fiestyval vykonvaŭ jašče i sacyjalnaznačnuju funkcyju – paśladoŭna zajmaŭsia raźvićciom nie tolki biełaruskamoŭnaj rekłamy i kamunikacyjnych prajektaŭ, ale i biełaruskaj śviadomaści.
Niezdarma kreatyŭny dyrektar adnaho ź viadučych rekłamnych ahienctvaŭ Biełarusi AIDA Pioneer Dźmitryj Apalenis u svaim niadaŭnim intervju adznačyŭ, što «fiestyval aDNaK! — heta sproba skazać, što, kali ty narodžany tut, havoryš na biełaruskaj movie i vykarystoŭvaješ hien kreatyvu, heta daść tabie bolš bonusaŭ dla biźniesu, ułasnaha raźvićcia. Heta sakretnaja zbroja, jakaja jość u kožnaha z nas i važna jaje vykarystoŭvać».
4. Kamunikacyjnaść
«Nie rekłamaj adzinaj!» – kažuć arhanizatary i zaprašajuć da ŭdziełu ŭ Fiestyvali aŭtaraŭ kulturnickich prajektaŭ, matyvujučy kulturnickija asiarodki budavać svaju kamunikacyju z patencyjnymi «spažyŭcami» praź miechanizmy biźnies-rekłamy, što značna pavyšaje jakaść samoha kulturnickaha praduktu.
A sumiesny ŭdzieł stvaralnikaŭ biźnies- i kulturnickaj rekłamy i kamunikacyjnych prajektaŭ spryjaje pahłybleńniu partniorstva pamiž imi.
5. Biaspłatny ŭdzieł
Nu i, badaj, samaja prostaja pryčyna – udzieł va ŭsich mierapryjemstvach Fiestyvalu, u tym liku ŭ adukacyjnaj prahramie, jak zaŭždy, biaspłatny. Takoj ščyraściu i adkrytaściu da patencyjnych udzielnikaŭ moža pachvalicca daloka nie kožny prafiesijny fiestyval. U adroźnieńnie ad anałahičnych biełaruskich i zamiežnych mierapryjemstvaŭ, fiestyval aDNaK! nie stavić kamiercyjnych metaŭ, a jość i budzie zastavacca hramadskaznačnaj źjavaj, jakaja dapamahaje stvarać admietnuju i kamfortnuju kulturnickuju atmaśfieru, u jakoj my z vami žyviem štodnia.
Kab padać svaju pracu, dastatkova zarehistravacca na sajcie adnak.by, abrać naminacyju i padnaminacyju i zapampavać rabotu!
Nie śpi – padavajsia!
Usie padrabiaznaści pra Fiestyval, naminacyi, umovy padačy rabot i ŭdziełu ŭ adukacyjnaj prahramie možna atrymać na sajcie adnak.by, pa telefonie +375 29 371-01-21 (Siarhiej Skarachod) albo praz e-mail: [email protected].
