U piatnicu Kaŭnaski akruhovy sud pryznaŭ vinavatym u ažyćciaŭleńni hienacydu i asudziŭ na šeść hadoŭ pazbaŭleńnia voli Stasisa Šymkusa — adnaho z abvinavačanych u spravie ab zatrymańni ŭ 1956 hodzie Adolfasa Ramanaŭskasa-Vanahasa kamandzira litoŭskich partyzan, jakija zmahalisia suprać savieckaj ułady.
Adolfas Ramanaŭskas-Vanahas.
«Sud pryjšoŭ da vysnovy, što Šymkus, udzielničajučy ŭ zatrymańni Ramanaŭskasa-Vanahasa i Birucie Mažejkajcie, za jakim byli katavańni, Ramanaŭskas byŭ rasstralany, a Mažejkajcie była adpraŭlenaja ŭ ssyłku, ažyćciaŭlaŭ hienacyd», — ahučyŭ u piatnicu prysud sudździa Vałdas Vitunskas.
Sprava razhladałasia i prysud abjaŭlaŭsia ŭ adsutnaść hramadzianina Biełarusi Šymkusa. Va ŭdzielnikaŭ pracesu paŭstała šmat sumnievaŭ nakont taho, ci žyvy jašče dzievianostahadovy abvinavačany. Heta pieršaja sprava ab hienacydzie ŭ Litvie, u jakim asoba asudžanaja zavočna.
Pavodle źviestak Hienprakuratury, asob sudzili pa spravach ab hienacydzie i raniej, ale ŭpieršyniu ŭ takoj spravie byŭ vyniesieny abvinavaŭčy prysud.
Šymkus abvinavačvajecca ŭ tym, što, budučy opierupaŭnavažanym represiŭnaj struktury SSSR, u 1956 hodzie ŭdzielničaŭ u sakretnaj apieracyi pa zatrymańni Ramanauskasa-Vanahasa i jaho žonki Birucie Mažejkajcie, paśla čaho Ramanaŭskas byŭ pasadžany ŭ turmu KDB u Vilni, dzie jaho žorstka katavali, a zatym asudžany na śmiarotnaje pakarańnie i rasstralany. Mažejkajcie była sasłanaja ŭ łahier.
Za čas kiravańnia Iosifa Stalina paśla vajny zahinuła bolš za 21 tysiaču litoŭcaŭ, jakija supraciŭlalisia savieckaj akupacyi, členaŭ ich siemjaŭ i ich prychilnikaŭ.
