Prefiekt Kanhrehacyi Božaha Kultu i Dyscypliny Sakramentaŭ zaprasiŭ da dyskusii vakoł viartańnia da celebracyi sv. Imšy «ad orientem», heta značyć tvaram na ŭschod, a nie paviarnuŭšysia da viernikaŭ.
«Vielmi važna, kab my viarnulisia jak maha chutčej da ahulnaj aryjentacyi, śviataroŭ i viernikaŭ, razam u adnym kirunku – na ŭschod ci, pa mienšaj miery, da apsidy – da Pana, Jaki prychodzić», skazaŭ kardynał Rabier Sara, jakoha cytuje «Catholic Herald», na liturhičnaj kanfierencyi ŭ Łondanie.
Prapanovu ŭžo nazvali samaj značnaj liturhičnaj zajavaj paśla dakumientu Benedykta XVI «Summorum Pontificum» z 2007 h., jaki dazvoliŭ bolš šyroki ŭžytak «trydenckaj imšy», dareformiennaha brevijaryja i dareformiennych abradaŭ.
Dobraj dataj dla ŭviadzieńnia źmien, dzie heta mahčyma, kiraŭnik vatykanskaj dykasteryi nazvaŭ Pieršuju niadzielu Adventu. Hety krok budzie «dobrym dla Kaścioła, i taksama dobrym dla našaha naroda», — pierakanany kardynał Sara.
U svaim vystupleńni ijerarch spasłaŭsia na prośbu papy Franciška, jaki daručyŭ jamu razhledzieć šlachi «reformy reformy» Druhoha Vatykanskaha Saboru ŭ halinie liturhii. Niekatoryja z reformaŭ, jakija adbylisia paśla Saboru, byli praviedzieny pad upłyvam duchu času i vyjšli za miežy liturhičnaj kanstytucyi «Sacrosanctum Concilium», choć Sabornyja Ajcy havaryli «nie pra revalucyju, a pra evalucyju», zaŭvažyŭ kardynał.
Kirunak «ad orientem» maje ŭ liturhii svajo značeńnie. Katalickija chramy ad staražytnych časoŭ budavalisia aryjentavanymi na ŭschod, adkul uzychodzić sonca. Heta było źviazana z pamiaćciu pra viartańnie Jezusa ŭ apošni dzień. Simvałam Chrysta, jaki prynosić śviatło i žyćcio, u chryścijanskaj tradycyi było mienavita sonca.
