Tancy na kaściach: Rasijskija ŚMI vylivajuć brud na Paŭła Šaramieta
Adrazu paśla zabojstva ŭ Kijevie biełaruskaha žurnalista Paŭła Šaramieta ŭ rasijskich ŚMI stali źjaŭlacca paklopnickija materyjały ab niabožčyku.
«NN» sabrała najbolš adyjoznyja acenki dziejnaści Šaramieta.
Life.ru: «Biełaruski partyzan» Šaramiet absłuhoŭvaŭ ukrainskich nieanacystaŭ
Kałumnist skandalnaha rasijskaha sajta life.ru Uładzisłaŭ Malcaŭ piša: «Ad leta 2014 hoda «Biełaruski partyzan» zajmaŭsia adkrytaj prapahandaj dla žycharoŭ Biełarusi — jak ukrainskich pravaradykałaŭ, hetak i biełarusaŭ, što vajujuć u roznych dobraachvotnickich bataljonach u zonie ATA. Ale bolš za ŭsio tam pijaryli i abialali ŭsio toj ža nieanacyscki «Azoŭ».
Urešcie Malcaŭ faktyčna abvinavačvaje ŭkrainskich pravych u zabojstvie Šaramieta: «Jamu było kamfortna tam, pakul pravaradykały biez saramlivaści i pieraškod zabivali dzieści pobač prarasiejskich dziejačaŭ, jakich Šaramiet zatym klejmavaŭ jak «piatuju kałonu», zaniatuju «padryŭnoj dziejnaściu». Ale zatym raptam niešta pajšło nie tak».
Regnum: Šaramieta zabili svaje ž
«Ukrainskija «kryminalisty» ŭ likvidacyi Šaramieta, viadoma ž, ubačyli rasiejski śled. Łuchta niesuśvietnaja, adnak ciapier modnaja va Ukrainie. Hramadstva maje patrebu ŭ tanizavalnych bajkach pra «rasiejskuju pahrozu». Čym čaściej — tym lepš. Tady kalektyŭny rozum viśnie, jak małamahutny kampjutar, zavaleny dziasiatkam adkrytych prahram. Adnak Rasii niama sensu destabilizavać situacyju ŭ krainie, dzie «destabilizataraŭ» i biez taho chapaje. Zabivali Šaramieta abaviazkova svaje i zusim nie praz žurnalisckuju dziejnaść», — piša Siarhiej Białoŭ na čarnasocienskim sajcie regnum.ru.
Eadaily.com: rusafobija i sieparatyzm
«Vidavočnym śviedčańniem arhanizatarskich zdolnaściaŭ Šaramieta staŭ zapusk niekalkich miedyjnych prajektaŭ, samym viadomym ź jakich źjaŭlajecca «Biełaruski partyzan». Ideałahičnaja linija dadzienych prajektaŭ prasočvałasia dosyć vyrazna: rusafobija i padtrymka sieparatysckich prajektaŭ na postsavieckaj prastory, radykalnaha nacyjanalizmu — u Biełarusi, va Ukrainie, u Hruzii i hetak dalej, haračaja padtrymka libieralizmu ŭ toj viersii, jakuju pryniata łajać i ŭ Biełarusi, i ŭ Rasii. Finansavańnie svaich prajektaŭ Šaramiet umudraŭsia atrymlivać z roznych krynic, u tym liku i rasijskich, ab čym pisali ŚMI.
Nie važna, na kaho «paviesiać» zabojstva Šaramieta — na Pucina, Łukašenku, vorahaŭ jaho paluboŭnicy ci Kim Čen Yna. Sutak nie prajšło ad vybuchu aŭtamabila na kijeŭskim skryžavańni, a takija biezadkaznyja śćvierdžańni ŭžo apublikavanyja «viedajučymi» ludźmi. Na samaj spravie važna toje, što z takimi ludźmi, jak Šaramiet, sychodzić epocha «lichich dzievianostych», — piša jašče adno adyjoznaje vydańnie.
«Svobodnaja priessa»: Šaramieta zabili, kab abvinavacić Rasiju
«Mahčymaja ekzatyčnaja viersija: Šaramieta zabili, kab abvinavacić Rasieju ŭ śmierci čarhovaha libieralnaha dziejača. Naprykład, dla taho, kab sarvać niejkija pieramovy, abo ŭzmacnić na ich svaje pazicyi.
Pa palityčnych mierkach, zabojstva Šaramieta — padzieja nievialikaja. Ale, naprykład, śmierć Siarhieja Mahnickaha, jaki zahinuŭ nie pa vinie rasijskich dziaržčynoŭnikaŭ, paśpiachova vykarystoŭvali, kab uvieści sankcyi suprać RF. Nie vyklučaju, što niešta padobnaje moža adbycca ciapier, i tyja ž ZŠA zapatrabujuć uzmacnić sankcyi ŭ dačynieńni da Rasiei», — piša ahladalnik sajta «Svabodnaja priessa», jaki redahuje viadomy rasijski piśmieńnik Zachar Prylepin.
«Viežlivaja Rośsija»: Šaramiet zaachvočvaŭ zabojstvy danieckich dziaciej
Hety tekst aktyŭna raspaŭsiudžvajecca ŭ sacyjalnych sietkach kštałtu «Adnakłaśnikaŭ» i «Ukantakcie».
«Paŭła vyciahnuli z mašyny. Nohi adarvanyja…
Jak u tych danbaskich dzietak, zabojstva jakich jon usialak zaachvočvaŭ, chaj i ŭskosna, z usialakimi pryhožymi palitkarektnym ahavorkami.
Ciapier tyja dzieci sustrenuć jaho na tym kancy tunela i skažuć: «Pryvitańnie, dziadźka Paša! Heta my. Jakich zabivali tvaje siabry z «Azova». Jak ty, dziadźka Paša?»
A jon im takoj paskardzicca, sa ślazami: «Vielmi balić!»
«Kamsamołka»: Revalucyja dajadaje svaich dziaciej
«Pavieł Šaramiet jašče doŭha pratrymaŭsia va Ukrainie, dziakujučy svajoj nieprymirymaj i palityčna-śpiełaj, bieskampramisnaj rusafobskaj pazicyi. Jon i rasijskuju armiju na Danbasie šukaŭ, i trupy pskoŭskich desantnikaŭ ličyŭ. Ale nie adhadaŭ tendencyi. A tendencyja takaja, što treci Majdan kijeŭskim uładam ciapier nie patrebien. Jon ad ich mokraha kryvavaha miesca nie pakinie, i źbiehčy, jak Janukovič, jany nie paśpiejuć. A voś «nieprymirymym», jakija sabralisia ŭ dobraachvotnickich bataljonach — novy Majdan patrebny, jak pavietra. Za try dni da svajoj hibieli Šaramiet napisaŭ apošniuju natatku pra bataljon «Azoŭ» i jaho kambata Bileckaha, praktyčna śviatych ludziej, ramantykaŭ revalucyi, žyćcio hatovych addać za radzimu. Praročyŭ Bileckamu vialikuju palityčnuju budučyniu, supraćpastaŭlaŭ dobraachvotnikaŭ-nacyjanalistaŭ samomu Parašenku. I imhnienna prakruciŭ koła Małocha na adzin abarot, i stała cisnuć u kryvavy marmieład svaich revalucyjnych dziaciej. I čužych dziaciej. Hetych baćkam revalucyi — naohuł nie škada», — piša ahladalnik «Komsomolskoj pravdy» Dźmitryj Ściešyn.
Ciapier čytajuć
«Usio tak ci inakš budzie vyrašacca na poli boju». Čym budzie zajmacca novaja kiraŭnica Misii demakratyčnaj Biełarusi va Ukrainie?1
Kamientary