U Respublikanski navukova-praktyčny centr dziciačaj chirurhii z pačatku lipienia pastupili 18 dziaciej z manietami ŭ straŭnikava-kišečnym trakcie, paviedamiŭ namieśnik dyrektara centra Alaksandr Machlin.
«Z 1 lipienia ŭ maleńkich pacyjentaŭ u našym centry vydalena 18 maniet sa stravavoda i straŭnika. Heta jašče pašancavała, što maniety trapili ŭ straŭnikava-kišečny trakt, a nie ŭ dychalnyja šlachi», — skazaŭ Alaksandr Machlin.
Pry trapleńni ŭ rot na ŭdychu inšarodnaje cieła moža apynucca ŭ dychalnych šlachach. U hetym vypadku pierakryvajecca dychańnie, i na praciahu chviliny moža nastupić śmierć dziciaci. Druhi varyjant — pradmiet traplaje ŭ straŭnikava-kišečny trakt. U stravavodzie ŭ miescach zvužeńnia manieta vialikaha dyjamietra moža stać upopierak, tym samym vyklikać amiarćvieńnie jaho ścienki. Pry hetym uźnikaje zapaleńnie ŭ hrudnoj paražninie, latalnaść pry jakim dasiahaje 50-70%. Pry trapleńni ŭ straŭnik inšarodnaje cieła moža vyklikać reakcyju ŭ vyhladzie vanit, tady manieta iznoŭ traplaje ci ŭ stravavod, dzie zatrymajecca, abo na ŭdychu — u dychalnyja šlachi.
Alaksandr Machlin adznačyŭ, što spačatku baćki mohuć nie zrazumieć, što adbyłosia. Dzicia niejki čas pje, jeść, a vanity ŭsprymajucca jak prajava infiekcyi. Pry najmienšym padazreńni na toje, što mały moh prahłynuć inšarodnyja pradmiety, nieabchodna źviarnucca pa miedycynskuju dapamohu. Kali ŭskładnieńni nie ŭźnikli adrazu, jany mahčymyja praź niejki čas, tady nastupstvy mohuć być niesumiaščalnymi z žyćciom.
Lekary surjezna zaniepakojenyja prablemaj i prosiać baćkoŭ być maksimalna ŭvažlivymi ŭ abychodžańni z padobnymi rečami. Maniety nie cacka dla dziaciej, ich treba zachoŭvać u kašalku biez dostupu małaletnich. Baćkoŭskaja niadbajnaść pryvodzić da vielmi ciažkich nastupstvaŭ: dzicia moža zastacca invalidam ci navat zahinuć.
