 |
Stanisłaŭ Šuškievič, lider Sacyjał‑demakratyčnaj Hramady: «Heta adzina pravilnaja ideja»
Mnie na siońniašni dzień zdajecca, što heta adzina pravilnaja ideja. Ale ja nia ŭ pravie vyrašać hetaje pytańnie sam pa sabie. My źbiarem u bližejšy čas centralnuju radu. Uličvajučy toje, što spadarynia Jarmošyna drenna adreahavała na naš list da jaje nakont taho, kab zrabić padlik hałasoŭ adkrytym i prystojnym, vidavočna, što bajkot zastajecca adzinym vyjściem z palityčnaj sytuacyi na hety momant. Ale ŭsio vyrašyć naša centralnaja rada.
Valancin, prahramist:«Bajkot — kontrpraduktyŭnaja ideja»
Kali b niejkija partyi, jakija mahli realna sabrać pad tryccać pracentaŭ hałasoŭ, bajkatavali vybary, heta było b, prynamsi, hučna. Ale ŭ našym vypadku važniej zafiksavać parušeńni zakonu z boku ŭładaŭ, čym być vybranymi ŭ pałatu. Tamu bajkot — absalutna kontrpraduktyŭnaja dzieja.
Raman Jakaŭleŭski, žurnalist:«Ja asabista bajkatuju vybary»
A ja ŭsie apošnija vybary bajkatuju asabista. Tamu što isnujučy ŭ Biełarusi vybarčy kodeks nie zabiaśpiečvaje volnaha volevyjaŭleńnia vybarca. Ja nia baču nijakaha sensu hulać u hetyja hulni. Heta dyskusija na temu, kolki pavinna być kvadratnych metraŭ u kletcy. Tamu ja asabista bajkatuju zaŭsiody. I tamu staŭlusia da bajkotu stanoŭča.
Jaŭhien, biźniesmen: «Nia treba być błaznami»
Ja nie padtrymlivaju hetyja hulni. Ale toj, chto choča, kab tut była demakratyja, pavinien rabić toje, što pavinien. Pavinny vyłučacca kandydaty, pavinna vieścisia ahitacyja, parušeńni pavinny rehistravacca. Nia treba być błaznami. Treba z uładaŭ rabić błaznaŭ. Chaj jany parušajuć ułasnyja zakony. A skazać, što «my niejabudziem prymać udzieł u farsie» — heta addać usio Łukašenku. Što jamu i treba. Dla jahonych budučych razvažańniaŭ pra «marhinalnuju apazycyju».
Siarhiej Klakin, lider PKB: «Bajkot — heta słabaja pazycyja»
Nie padtrymlivaju, bo bajkot va ŭmovach Biełarusi — heta prosta hłupstva. I tyja, chto jaho prapanujuć, prosta nie razumiejuć palityčnuju sytuacyju. Chaj nia ŭdzielničajuć «u farsie». Lahčej lehčy na kanapu i pić piva. Z hetaha vynikaje inšaje pytańnie. A navošta naohuł vieści palityčnuju baraćbu z režymam, kali ŭsio vidavočna? Režym mocny, jon kantraluje ŭsio naohuł. Navošta zajmacca palityčnaj dziejnaściu. Treba lehčy na kanapu i čakać śmierci ci svajoj ci hetaha režymu. Bajkot — heta vielmi słabaja pazicyja. Jana mahčymaja tady, kali, naadvarot, jość niejkija demakratyčnyja ŭmovy. Tady možna zrabić niešta dla taho, kab ludzi nie pryjšli na vybary. A dla hetaha patrebna, kab ludzi viedali, čamu jany nie pavinny iści. A dla hetaha treba mieć u rukach mocnyja srodki masavaj infarmacyi. Našaha hramadzianina chutčej možna ŭhavaryć pajści na vybary, čym bajkatavać vybary. Heta vielmi doŭhaja praca, i bajkot vielmi redka dzie ŭžyvajecca ŭ śviecie. I z dapamohaj bajkotu nichto jašče nie prychodziŭ da ŭłady.
Siarhiej, buchhałtar: «Lepš pačakaju prezydenckich vybaraŭ»
Ja na hetyja vybary nie pajdu. Ale heta nie bajkot. Prosta nia baču sensu ŭ hetym. Albo jany vykinuć moj biuleteń «za apazycyjanera», kali ja pajdu. Albo pastaviać ptušku «za svajho», kali ja nie pajdu. Što ad hetaha źmienicca? Ja lepš pačakaju prezydenckich vybaraŭ.
Aleś Ancipienka, kulturolah: «Pytańnie zadadziena našamu hramadztvu»
Ja nastolki hłyboka zadumaŭsia nad hetym pytańniem, što nia maju adkazu. Ja sprabuju zrazumieć dla siabie, jakoje rašeńnie treba pryniać. Zrazumieć nia sercam ci intelektam, ale ŭsioj svajoj istotaj. I siońnia ja nijak nie mahu adkazać. Hetaje pytańnie zadadziena našamu hramadztvu. Hramadztva na jaho nijak nie reahuje. A niekatoryja zadumalisia. U tym liku i ja. Mianie strymlivaje z peŭnym adkazam adsutnaść racyjanalnaha raźliku. Ja pakul nie mahu praličyć sytuacyju. Ja nie kirujusia sercam. Ja nie kirujusia intuicyjaj. Ja kirujusia racyjanalnym raźlikam, jaki bazujecca na sercy, na intuicyi i na sprobie zrazumieć, što jość Biełaruś. I pakul heta ŭsio ŭ mianie nie składajecca ŭ adkaz.
Alena, studentka: «A raptam moj hołas niešta vyrašyć»?
U mianie hetyja vybary buduć pieršyja ŭ žyćci, kali ja zmahu prahałasavać. I što? Vy mnie raicie nie skarystacca svaim hołasam? Nie, ja na vybary pajdu abaviazkova. Chočacca pabyć darosłaj. A raptam, moj hołas niešta vyrašyć?
Aleś Michalevič, BNF: «Bajkot nie padtrymlivaju»
Nie, ja nie padtrymlivaju ideju bajkotu vybaraŭ. Ja liču, što vielmi važna, kab usie demakratyčnyja siły damovilisia adnosna supolnaj taktyki. Pakolki ja nia baču vierahodnaści, što bolšaść damovicca adnosna bajkotu, to ja jaho i nie padtrymlivaju.
Valancin Akudovič, filozaf: «Udzieł u vybarach razburaje stereatypy pra apazycyju»
Nie padtrymlivaju i nikoli nie padtrymlivaŭ. Mnie dobra viadomyja arhumenty tych, chto zaklikaje da bajkotu. Pieradusim heta toje, što deputaty ŭ Viarchoŭny Saviet realna ŭ našaj sytuacyi nie abirajucca, a pryznačajucca ŭładami. Što nia majučy šancaŭ pieramahčy, apazycyja svaim udziełam tolki lehitymizuje ŭładu. Hetyja i mnostva inšych arhumentaŭ słušnyja. Ale tolki prymajučy ŭdzieł u vybarach, apazycyja realna lehitymizuje siabie ŭ vačach biełaruskaha hramadztva. Jurydyčnaja rehistracyja palityčnych partyj i ruchaŭ — heta tolki farmalny akt. Vuličnyja akcyi — tolki forma supracivu ŭładam. A voś vybary — heta ŭžo sapraŭdnaje śviedčańnie taho, što apazycyja realna vyjaŭlaje siabie ŭ palityčnych pracesach krainy. Jość jašče adzin vielmi istotny arhument suprać bajkotu. Dla asnoŭnaj masy nasielnictva Biełarusi, jak, darečy, i dla ŭsich strukturaŭ ułady, apazycyja bačycca voraham i narodu, i dziaržavy. I tamu kožny lehitymny ŭdzieł apazycyi ŭ vybarach prosta ci ŭskosna kali nie razburaje, dyk stavić pad sumnieŭ hety stereatyp. Karaciej kažučy, bajkatavać vybary — heta z ułasnaje voli macavać stereatyp apazycyi jak voraha biełaruskaha narodu.
