Biełaruskija chryścijanskija demakraty 30 lipienia ŭ Minsku nasuprać novaj rezidencyi Alaksandra Łukašenki pa praśpiekcie Pieramožcaŭ praviali pikiet pamiaci źnikłaha 17 hadoŭ tamu ministra ŭnutranych spraŭ Biełarusi Juryja Zacharanki i ŭ padtrymku jaho maci spadaryni Ullany.
Minčanie stavili podpisy pad patrabavańniami maci palityka, jakaja prosić pryznać svajho syna pamierłym. Heta treba i dla ŭšanavańnia jaho pamiaci, i dla vyrašeńnia šerahu inšych pytańniaŭ.
U pikiecie ŭdzielničali sustaršynia arhkamitetu BCHD Vital Rymašeŭski, adkazny sakratar Dzianis Sadoŭski, lidar Maładych chryścijanskich demakrataŭ Maryna Chomič, kiraŭnik Chryścijanska-demakratyčnaha ruchu Volha Kavalkova i inšyja. Pikiet prachodziŭ pad bieł-čyrvona-biełymi ściahami z partretami Juryja Zacharanki.
«Ludzi sami padychodzili, stavili svaje podpisy. Niekatoryja ź ich navat zachacieli dałučycca da chryścijanskaj demakratyi. U adroźnieńnie ad biełaruskich uładaŭ mienčuki pamiatajuć byłoha ministra. Toje, što zaraz adbyvajecca z boku ŭładaŭ, - heta ništo inšaje, jak ździek z pamiaci sumlennaha aficera biełaruskaha MUS i mužnaha hramadzianina, jak ździek ź jaho maci. Z adnaho boku sapraŭdnaje śledstva nie viadziecca, z druhoha boku jaho nie pryznajuć zahinułym», - adznačyŭ Vital Rymašeŭski.
Jon adznačyŭ, što zajava maci Juryja Zacharanka budzie razhladacca ŭ paniadziełak 1 žniŭnia ŭ Minskim haradskim sudzie pa vulicy Dunina-Marcinkieviča, 1. Pačatak a 10:00. Sustaršynia BCHD zaklikaŭ usich pryjści da suda, kab ušanavać pamiać byłoha ministra i padtrymać spadaryniu Ullanu.
