Kniha raskazvaje pra kryminalnyja spravy suprać aktyvistaŭ apazycyi, što dajšli da sudu ciaham minułaha hodu. Dzień prezentacyi byŭ abrany nievypadkova — mienavita 29 traŭnia hod tamu byŭ vyniesieny prysud pa spravy piacioch «maładafrontaŭcaŭ».
Ideja stvareńnia takoha zbornika naležyć Alesiu Bialackaha, usiu redaktarskuju i arhanizacyjnuju pracu vykanała Alena Łapcionak.
Vice‑prezydent Mižnarodnaj federacyi pravoŭ čałavieka Aleś Bialacki va ŭstupnym słovie skazaŭ, što zaŭsiody cikava viedać pra peŭnaha aktyvista nia tolki z suchoj chroniki supracivu, ale taksama, što heta za čałaviek, čym jon žyvie, pra što dumaje, čym cikavicca.
«Heta, jak čytać los frantavikoŭ. U kožnaha svaja historyja, trahiedyja, zmahańnie. Mnie zdajecca, što kniha zmahła adlustravać duch epochi», — kaža Aleś Bialacki.
Pravaabaronca z sumam adznačyŭ, što ŭ nastupnym hodzie padobnaja kniha budzie bolš toŭstaja. Adzin «Praces čatyrnaccaci» pa ŭdzielnikach amal całkam pierabivaje letašnich fihurantaŭ kryminalnych spravaŭ.
Ahułam kniha raskazvaje pra piatnaccać čałaviek, jaki prajšli praz kryminalnyja sudy za palityčnuju dziejnaść — Kastusia Łukašova, Źmitra Chviedaruka, Barysa Hareckaha, Aleha Korbana, Alaksieja Janušeŭskaha, Nastu Pałažanku, Valera Ščukina, Andreja Klimava, Nastu Azarku, Ivana Šyłu, Jarasłava Hryščeniu, Źmitra Daškieviča, Natallu Iljinič, Artura Fińkieviča. Naprykancy zbornika taksama pieraličajuć tyja spravy, jakija nie paśpieli skončyć u 2007 hodzie ci spynili.
Na prezentacyi prysutničali mnohija z hierojaŭ knihi. Andrej Klimaŭ, jaki ŭžo trojčy adbyvaŭ turemnaje pakarańnie za svaju palityčnuju dziejnaść, skazaŭ: «Ja nie chaču kazać patasnych słovaŭ, ale ludzi ź «Viasny» litaralna vyratavali mnie žyćcio».
Prysutnyja taksama pavinšavali z dniom naradžeńnia jašče adnaho hieroja zbornika Alaksieja Janušeŭskaha, jakomu spoŭniŭsia dvaccać adzin hod.
Aŭtarami knihi stali biełaruskija niezaležnyja žurnalisty, siarod jakich i aŭtary «Našaj Nivy».
 |
