Z pačatku hoda ŭ Minsku zarehistravany 401 vypadak VIČ-infiekcyi, paviedamlaje sanitarna-epidemijałahičnaja słužba stalicy.
Letaś sa studzienia pa lipień było zarehistravana 460 vypadkaŭ. Na 1 žniŭnia ŭ Minsku pražyvała 3.338 čałaviek ź VIČ-stanoŭčym statusam, što składaje 0,17% ad ahulnaj kolkaści nasielnictva horada. Najbolšaja kolkaść VIČ-pazityŭnych ludziej pražyvaje na terytoryi Zavodskaha (19%) i Frunzienskaha (21%) rajonaŭ Minska.
Za minuły pieryjad hetaha hoda siaredni ŭzrost novavyjaŭlenych VIČ-pazityŭnych pacyjentaŭ skłaŭ 34 hady. Vypadki infikavańnia rehistravalisia ŭ ludziej ad 18 da 72 hadoŭ, pry hetym 70% vypadkaŭ vyjaŭlena ŭ asabliva pracazdolnym uzroście ad 25 da 39 hadoŭ. U 66% vypadkaŭ nośbitami VIČ-infiekcyi źjaŭlajucca mužčyny.
Za 29-hadovy statystyčny pieryjad nazirańnia ŭ struktury asnoŭnych šlachoŭ infikavańnia ŭdzielnaja vaha pałavoha šlachu pieradačy skłała 42,7%, na dolu niemiedycynskaha injekcyjnaha ŭviadzieńnia narkatyčnych rečyvaŭ pryjšłosia 55%, pieradača VIČ-infiekcyi ad maci dziciaci skłała 0,9%, u 1,3% vypadkaŭ šlach pieradačy nie byŭ ustanoŭleny.
U 62,8% usich zarehistravanych vypadkaŭ zaražeńnie adbyłosia pry injekcyjnym uviadzieńni narkatyčnych srodkaŭ. Na dolu pałavoha hieterasieksualnaha šlachu pieradačy pryjšłosia 29,7% vypadkaŭ VIČ-infiekcyi, homasieksualnaha — 6,2%. U 1% vypadkaŭ šlach pieradačy nie byŭ ustanoŭleny.
Sioleta zarehistravany adzin vypadak viertykalnaj pieradačy VIČ ad maci dziciaci. Usiaho z 1987 hoda ad VIČ-infikavanych maci naradziłasia 504 dziciaci, dyjahnaz «VIČ-infiekcyja» paćvierdžany 36 dzieciam ad 0 da 14 hadoŭ, ź ich u piaci dyjahnastavana stadyja ŚNIDu, adno dzicia pamierła.
Pa roznych pryčynach za 29 hadoŭ pamierła 496 pacyjentaŭ. Za hety čas zarehistravana 414 vypadkaŭ stadyi ŚNIDu, u jakoj pamierła 200 čałaviek.
