Kanstytucyjny sud Polščy vyrašyŭ, što častka zakanadaŭstva, jakoje refarmuje pracu samoha suda, nie adpaviadaje kanstytucyi krainy.
Na naradzie ŭ čaćvier sud pryznaŭ niekanstytucyjnaj papraŭku, zhodna ź jakoj, kab nakłaści na rašeńnie vieta, treba, kab za heta vykazalisia čatyry z 15 sudździ KS.
Taksama sud adchiliŭ źmienu, jakaja abaviazvaje jaho razhladać usie spravy ŭ chranałahičnym paradku. Ciapier rašeńnia suda čakajuć kala 400 skarhaŭ. Kali papraŭka budzie pryniataja, to na praktycy novyja zakony nie buduć praviaracca sudom na praciahu niekalkich hadoŭ.
Urad pryniaŭ rašeńnie ab reformie kanstytucyjnaha suda krainy ŭ kancy minułaha hoda.
Hetaje rašeńnie pryviało da akcyj pratestu ŭ krainie i krytyki z boku ES. U Jeŭrakamisii paličyli, što reforma pahražaje viaršenstvu prava ŭ krainie. ES abiacaje nakłaści na Polšču sankcyi, kali kryzis nie budzie vyrašany ŭ bližejšyja miesiacy.
Pasiadžeńnie suda ŭ hety čaćvier supravadžałasia akcyjami pratestu: ludzi, jakija sabralisia kala budynku sudu, patrabavali admianić papraŭki.
Sud užo pryznavaŭ reformu niezakonnaj u sakaviku hetaha hoda. Adnak premjer-ministr krainy Bieata Šydła zajaviła, što ŭrad budzie ihnaravać rašeńnie suda i praviadzie reformu.
Zakon byŭ pryniaty parłamientam krainy ŭ lipieni, a zatym jaho padpisaŭ prezident Polščy Andžej Duda.
U listapadzie minułaha hoda da ŭłady ŭ krainie pryjšła kansiervatyŭnaja partyja «Prava i spraviadlivaść». Amal adrazu paśla hetaha partyja pačała nastojvać na reformie kanstytucyjnaha suda krainy, a taksama prapanoŭvać svaich kandydataŭ na pasadu sudździaŭ.
Na dumku pradstaŭnikoŭ partyi, siarod sudździaŭ KS zanadta šmat ich palityčnych apanientaŭ. Kali nie refarmavać sud, to «Prava i spraviadlivaść» nie zmoža pravodzić svaju kansiervatyŭnuju palityku.
Mnohija pravaabaroncy nastojvajuć, što reforma pahražaje pryncypu padziełu ŭłady i niezaležnaści sudovaj sistemy
