Kandydat u deputaty Pałaty pradstaŭnikoŭ pa Škłoŭskaj vybarčaj akruzie № 90, namieśnik staršyni Partyi BNF Ryhor Kastusioŭ patrabuje ad Centrvybarkama admianić rehistracyju kandydatam u deputaty pa svajoj akruzie pamočnika prezidenta Biełarusi Dźmitryja Hobarava. Adpaviednuju zajavu Kastusioŭ nakiravaŭ staršyni CVK Lidzii Jarmošynaj.
Svajo patrabavańnie Kastusioŭ abhruntoŭvaje «najhrubiejšym parušeńniem vybarčaha zakanadaŭstva» z boku Hobarava. Jak adznačajecca ŭ zajavie, pavodle dziejnaha zakanadaŭstva paśla rehistracyi kandydatam u deputaty akruhovaj kamisii 11 žniŭnia Hobaraŭ pavinien byŭ syści ŭ adpačynak na čas vybarčaj kampanii. Adnak jon hetaha nie zrabiŭ. U pryvatnaści, 15 žniŭnia Hobaraŭ braŭ udzieł u naradach, źviazanych ź jaho słužbovymi abaviazkami, u čas rabočaj pajezdki kiraŭnika dziaržavy pa Bresckaj vobłaści. Hetaja padzieja mieła šyrokaje aśviatleńnie ŭ roznych ŚMI i spryjała papularyzacyi Hobarava ŭ jakaści kandydata ŭ deputaty Pałaty pradstaŭnikoŭ, piša Kastusioŭ.
16 žniŭnia Hobaraŭ u jakaści kandydata ŭ deputaty naviedaŭ Mahiloŭ i rehijony Mahiloŭščyny, vykarystoŭvajučy svajo słužbovaje stanovišča, adznačajecca ŭ zajavie.
Varta ŭličyć, što da svajho pryznačeńnia ŭ 2013 hodzie na pasadu pamočnika prezidenta — hałoŭnaha inśpiektara pa Bresckaj vobłaści Dźmitryj Hobaraŭ pracavaŭ na roznych kirujučych pasadach u Mahiloŭskaj vobłaści. Jon, u pryvatnaści, byŭ pieršym namieśnikam staršyni Škłoŭskaha rajvykankama, a paźniej uznačalvaŭ Kruhlanski i Mahiloŭski rajvykankamy.
Na dumku hramadskich aktyvistaŭ Mahiloŭskaj vobłaści, pry vyłučeńni Dźmitryja Hobarava kandydatam u deputaty Pałaty pradstaŭnikoŭ vykarystoŭvaŭsia administracyjny resurs — hety kandydat karystajecca nieabmiežavanaj padtrymkaj z boku ŭładnaj «viertykali» Mahiloŭskaj vobłaści, adznačajuć «Pravaabaroncy za svabodnyja vybary».
Kopija zajavy Kastusiova nakiravanaja hienieralnamu prakuroru Biełarusi Alaksandru Kaniuku.
