Reaktyŭnaja sistema załpavaha ahniu (RSZA) «Pałanez» pryniata na ŭzbrajeńnie 336-j reaktyŭnaj artyleryjskaj bryhady Uzbrojenych Sił Biełarusi.
«Sistema «Pałanez» pryznačana dla asnaščeńnia reaktyŭnaha dyvizijona bryhady. RSZA dazvolić značna pavysić bajavuju mahčymaść rakietnych vojskaŭ i artyleryi i abarončyja mahčymaści dziaržavy ŭ cełym», — skazaŭ načalnik Hienieralnaha štaba Uzbrojenych Sił - pieršy namieśnik ministra abarony hienierał-major Aleh Biełakonieŭ.
Hałoŭnyja taktyka-techničnyja charaktarystyki «Pałaneza» adpaviadajuć lepšym uzoram zamiežnych sistem reaktyŭnaj artyleryi. «Mnohija techničnyja rašeńni, realizavanyja ŭ RSZA biełaruskimi raspracoŭščykami, nie majuć anałahaŭ u śviecie. Pryniaćcie novych uzoraŭ uzbrajeńnia źjaŭlajecca adnym z elemientaŭ stratehičnaha strymlivańnia. Reaktyŭnyja sistemy załpavaha ahniu źjaŭlajucca najbolš mahutnym srodkam ahniavoj padtrymki naziemnych hrupovak vojskaŭ», — adznačyŭ Aleh Biełakonieŭ.
Unikalnyja charaktarystyki hetaj sistemy byli paćvierdžanyja ŭ chodzie bajavych puskaŭ u Homielskaj vobłaści raźlikami 336-j reaktyŭnaj bryhady. «Praviedziena dva puski rakiet, celi parazili, vyprabavańni paćvierdzili efiektyŭnaść i nadziejnaść sistemy. Raźliki, jakija absłuhoŭvajuć RSZA, pakazali vysoki ŭzrovień padrychtoŭki. Vajennasłužačyja prachodzili śpiecyjalnaje navučańnie bolš za dva miesiacy na zavodzie-vytvorcy», — raskazaŭ kamandzir 336-j reaktyŭnaj artyleryjskaj bryhady pałkoŭnik Alaksandr Ciškievič.
RSZA «Pałanez» pryznačana dla paražeńnia adkryta raźmieščanaj i ŭkrytaj žyvoj siły, niebraniravanaj i braniravanaj vajennaj i vajenna-śpiecyjalnaj techniki, artyleryi, rakietnych i zienitnych rakietnych kompleksaŭ, avijacyjnaj techniki na aeradromach baziravańnia i inšych abjektaŭ na dalokaści ad 50 km da 200 km z vysokaj dakładnaściu.
