Nieviadomy mužčyna pahražaje ŭčynić vybuch u banku ŭ centry Maskvy, paviedamlaje pres-słužba rasijskaha MUS.
«Siońnia kala 18:45 u adździaleńnie banka na Vialikaj Nikickaj vulicy Maskvy ŭvajšoŭ mužčyna. Miarkujecca, u pamiaškańni ŭ hety momant znachodzilisia troje rabotnikaŭ ustanovy i adzin naviedvalnik», — havorycca ŭ aficyjnym paviedamleńni viedamstva.
Miesca zdareńnia ačeplena palicyjaj. Da banka prybyli bajcy SACHR.
Havorka idzie pra adździaleńnie «Sicibanka» na Vialikaj Nikickaj vulicy, paviedamlajuć ŚMI. U samim banku paviedamili, što jaho supracoŭniki pracujuć z pravaachoŭnymi orhanami, kab ułahodzić situacyju ŭ samyja karotkija terminy.
Interfaks paviedamlaje ab vyzvaleńni dźviuch supracoŭnic banka. TASS paviedamlaje, što ich ciapier dapytvajuć supracoŭniki pravaachoŭnych orhanaŭ.
Na miesca zdareńnia prybyŭ kiraŭnik staličnaj palicyi Anatol Jakunin, jaki, pa dadzienych Interfaksa, asabista viadzie pieramovy z zachopnikam. Da budynka banka taksama pryjechali supracoŭniki inžynierna-sapiornaha adździaleńnia palicyi i supracoŭniki pažarnaj achovy.
Palicejskaja mašyna pierakryła Vialikuju Nikickuju vulicu. Da budynka nie puskajuć piešachodaŭ, a mašyny prosiać jechać u abjezd. Na samoj Vialikaj Nikickaj adklučyli aśviatleńnie, taksama śviatło vyklučyli ŭ budynku Maskoŭskaj dziaržaŭnaj kansiervatoryi imia Čajkoŭskaha, jakaja znachodzicca pobač z bankam.
Napadniku na vyhlad 50-60 hadoŭ. Na šyi ŭ jaho visić skrynka, abmatanaja skotčam, ź jakoj tyrčać pravady. Pavodle dadzienych RIAN, mužčyna niećviarozy.
Interfaks sa spasyłkaj na krynicu ŭ pravaachoŭnych orhanach nazvaŭ imia padazravanaha: pavodle papiarednich dadzienych, zakładnikaŭ zachapiŭ 55-hadovy pradprymalnik Aram Pietrasian, jaki akazaŭsia ŭ daŭhach z-za prablem ź biznesam. Pietrasian, pavodle dadzienych ahienctva, rehularna nakiroŭvaŭ u roznyja dziaržorhany inicyjatyvy pa padtrymcy biznesu.
Telekanał «Doždž» z dapamohaj prahramy FindFace znajšoŭ staronku napadnika ŭ sacyjalnaj sietcy UKantakcie. Telekanał taksama nazyvaje imia Arama Pietrasiana 1961 hoda naradžeńnia.
Pietrasian raźmiaściŭ u YouTube zvarot da prezidenta Rasii Uładzimira Pucina, dzie papiaredziŭ, što 24 žniŭnia 2016 hoda jon «budzie iści na rezkaje rezanansnaje parušeńnie Kryminalnaha kodeksa RF». U videazvarocie jon apisvaje, što na hety krok jaho šturchnuła prablema bankructva jurydyčnych i fizičnych asob, jakuju jon paraŭnoŭvaje z «čumoj». Jon skardzicca na kalektaraŭ i banki.
«Mnie, paviercie, hublać niama čaho. Usio, što było, ja ŭžo straciŭ», — kaža biznesoviec.
Pavodle jaho słoŭ, jon patrabuje «pryznać na dziaržaŭnym uzroŭni bankructva fizičnych asob i jurydyčnych asob chvarobaj», a taksama stvaryć novy instytut dla vyrašeńnia hetych prablem. U videa jon nazyvaje hety instytut «balnicaj dla biznesoŭcaŭ». Jon skardzicca, što jość balnicy dla narkamanaŭ, VIČ-infikavanych, ale nie dla biznesoŭcaŭ.
Zakon ab bankructvie fizičnych asob byŭ pryniaty ŭ RF jašče ŭ 2014 hodzie i nabyŭ moc minułym letam.
Kamientary