Rasija arhanizuje spabornictvy dla niedapuščanych na Paralimpijadu ŭ Rya rasijskich spartoŭcaŭ, zajaviŭ prezident RF Uładzimir Pucin. Uznaharody dla ŭdzielnikaŭ hetych hulniaŭ buduć raŭnacennyja paralimpijskim, skazaŭ jon.
«Chaču skazać našym paralimpijcam: my, zrazumieła, budziem vas padtrymlivać i śpiecyjalna arhanizujem spabornictvy, dzie vy zmožacie pakazać usio svajo majsterstva, a zaachvočvańnie dla pieramožcaŭ i pryzioraŭ budzie takim ža, jakim jano było b i pa vynikach Paralimpijskich hulniaŭ», — skazaŭ Pucin na ŭručeńni dziaržaŭnych uznaharod rasijskim alimpijcam, jakija viarnulisia ŭ Maskvu.
Kamientujučy rašeńnie Mižnarodnaha paralimpijskaha kamiteta nie dapuskać rasijan da hulniaŭ, Pucin nazvaŭ jaho nialudskim.
«Rašeńnie ab dyskvalifikacyi našych paralimpijcaŭ — pa-za pravam, pa-za marallu i pa-za čałaviečnaściu», — skazaŭ jon.
Pra rašeńnie adchilić ad spabornictvaŭ rasijskuju paraalimpijskuju zbornuju ŭ siaredzinie žniŭnia abviaściŭ kiraŭnik MPK Filip Krejvien.
«Poŭnaja karumpavanaść antydopinhavaj sistemy ŭ Rasii supiarečyć praviłam i bje ŭ samaje serca paralimpijskaha sportu. Heta aburalnaje hrebavańnie zdaroŭjem i dabrabytam atletaŭ, hetamu nie miesca ŭ paralimpijskim sporcie», — zajaviŭ jon.
Pucin ža ličyć, što hetaje rašeńnie, jak i rašeńnie adchilić rasijskich lohkaatletaŭ ad Alimpijady, było palityčnym.
«Na vialiki žal, my stali śviedkami taho, jak humanistyčnyja asnovy sportu i alimpizm nachabna parušajucca palitykaj, jak kanjukturna vyrašajucca pytańni, jak takija jakaści, jak karyślivaść, a, moža być, i bajaźlivaść, biaruć vierch nad pryncypami alimpizmu», — skazaŭ Pucin.