Siarod pradpryjemstvaŭ Minskaj vobłaści, jakija dapuścili zapazyčanaść pierad biudžetam, akazałasia fiermierskaja haspadarka «Cnianskija ekapradukty» Uładzimira Adamoviča. U «čorny śpis» kampanija patrapiła praź niekalki dzion paśla vizitu ŭ jaje prezidenta.
Nahadajem, u samym kancy lipienia «Cnianskija ekapradukty», jaki stvaryŭ i raźvivaje ŭ Łahojskim rajonie viadomy biznesmien-farmaceŭt Uładzimir Adamovič, naviedaŭ Alaksandr Łukašenka. Prezidentu ŭ fiermiera spadabałasia.
«Kali niama kiraŭnika — nikoli nie budzie haspadarki, — padkreśliŭ kiraŭnik dziaržavy. — Dajcie mnie sotniu revalucyjanieraŭ — i my pieravierniem Biełaruś. Jość narmalnyja ludzi, i im treba addavać ziamlu».
«U nas jość dobryja fiermiery, jakija siabie zarekamiendavali. Chočuć — addajcie lepš im. I nie śpiašajeciesia addavać zamiežnikam. A kali addajacie, to žalezabietonna pad umovy. Siało ŭ nas vychodzić na narmalny ŭzrovień raźvićcia. Nie straćcie kiravańnia ŭ sielskaj haspadarcy», — adznačyŭ padčas naviedvańnia «Cnianskich ekapraduktaŭ» Alaksandr Łukašenka.
Na 1 žniŭnia, adnak, fiermierskaja haspadarka Uładzimira Adamoviča akazałasia ŭ śpisie subjektaŭ haspadarańnia Minskaj vobłaści, jakija majuć zapazyčanaść pierad biudžetam. U Ministerstvie pa padatkach i zborach nie kamientujuć pryčyny ŭklučeńnia haspadarki ŭ śpis i pamier mahčymaj zapazyčanaści.
Siarod daŭžnikoŭ na 1 žniŭnia hetaha hoda (u adroźnieńnie ad «Cnianskich ekapraduktaŭ» — na praciahu davoli praciahłaha času) fihuruje jašče adna znakavaja haspadarka z pryvatnym kapitałam. Heta — pieršy dośvied zamiežnych inviestycyj u biełaruskim ahrakompleksie «Štoc Ahra-Servis» u Smalavickim rajonie. Jaho ŭładalnikami źjaŭlajucca niemcy Łorenc-Pieter Štoc i Valtraŭd Šustak, jakija nabyli ŭ pačatku 2000-ch hadoŭ miascovyja kałhasy «Leninski šlach» i «Piekalin».
Na praciahu niekalkich miesiacaŭ u «čorny śpis» traplaje viadomaja budaŭničaja kampanija «Manalit Hrup» Mikałaja i Alaksieja Jermašovych. U im jana susiedničaje z byłym prajektam bankira Mikałaja Łahuna i Prezidenckaha spartyŭnaha kruba «Holf Kłub». Afilavanaja z «Manalit Hrup» struktura Jermašovych «Zialonaja havań» pa ŭkazie prezidenta budzie dabudoŭvać i holf-kłub, i katedžny pasiołak pry im na płoščy 380 hiektaraŭ. Na heta Jermašovym adviedzieny termin da 2030 hoda.
Siarod viadomych daŭžnikoŭ, jakija fihuravali ŭ «čornym śpisie» pa Minščynie na pačatak žniŭnia, znachodziacca kampanii «Bielintertrans» Viačasłava Doŭnara, «OBKstandart» ziacia eks-premjera Sidorskaha Juryja Markaviča, «Handlovy śviet Kalco» źbiehłaha deviełapiera Juryja Aviarjanava, «Iŭkon», «Pivavarnaja kampanija «Bivier», Salihorski zavod technałahičnaha abstalavańnia, akcyjaniery jakoha ciapier masava raspradajuć svaje akcyi.
U Biełarusi ažyjatažny popyt na spłavy na bajdarkach1
Kamientary