Čarhovy pravakacyjny artykuł na biełaruskuju tematyku źjaviŭsia na skandalnym sajcie «Rehnum», materyjał maje krasamoŭnuju nazvu «Navošta Biełaruś choča vajavać z Rasijaj?». Jaho aŭtar, štatny śpiecyjalist resursa pa Biełarusi — Mikałaj Radaŭ.
Radaŭ adznačaje, što ŭ adnosinach Biełarusi i Rasii ciapier nie samyja prostyja časy. Vydańnie ličyć, što siońnia ŭ Biełarusi amal u adkrytuju «prapahandujucca rusafobskija idei i łozunhi». Pryčym, kali raniej hetym zajmałasia apazicyja, to ciapier rej pierachapili ŭłady.
«Mienavita čynoŭniki paturajuć raspalvańniu rusafobii», — adznačaje Radaŭ.
Asablivaja krytyka dastajecca niadaŭniamu dakładu Centra stratehičnych i palityčnych daśledavańniaŭ «Biełaruś u kantekście supraćstajańnia Rasija—NATA: Pahrozy i vykliki dla suvierenitetu, niezaležnaści i nacyjanalnaj biaśpieki. Stratehičnyja vysnovy i rekamiendacyi». Aŭtarami dakładu źjaŭlajucca kiraŭniki arhanizacyi Arsień Sivicki i Juryj Caryk.
«Kali b heta byli apazicyjaniery, to možna było b nie źviartać uvahi, adnak centr źjaŭlajecca absalutna praŭładnaj arhanizacyjaj z całkam aficyjnym statusam i padtrymkaj MZS», — pišuć na «Rehnumie».
Na dumku Radava, u Biełarusi prachodzić padrychtoŭka hramadskaj śviadomaści dla ŭkaranieńnia Rasii jak patencyjna niebiaśpiečnaha susieda.
«Akazvajecca, što Maskva ŭzmacniaje ŭsiebakovy cisk pry dapamozie raźmiaščeńnia na miažy ź Biełaruśsiu svaich vojskaŭ «u kolkaści, patencyjna dastatkovaj dla taho, kab realizavać na biełaruskaj terytoryi miery «hibrydnaj vajny», anałahičnyja pa maštabie tym, jakija byli realizavany na ŭschodzie Ukrainy», — krytykujucca miescy z dakłada Caryka i Sivickaha.
Analityki ličać, što «z suvierennaj dziaržavy Biełaruś pavinna pieratvarycca ŭ «šeruju zonu» — terytoryju, na jakuju i praź jakuju Rasijskaja Fiederacyja budzie prajecyravać siłu i kiravać kanfliktnaj dynamikaj u rehijonie».
«Dakłady Centra źjaŭlajucca zakaznymi z boku dziaržavy. Paćviardžajecca heta tym, što z boku dziaržaŭnych orhanaŭ niama nijakaj reakcyi na takuju «analityku».
Mikałaj Radaŭ naprykancy prychodzić da nastupnaha vyvadu: «Vyšejzhadany dakład, jak i šerah padobnych jamu, pavinien pastupova,
kropla za kroplaj, farmiravać u masavaj śviadomaści prostych hramadzian novaje pačućcio strachu, u asnovie jakoha zakładziena ideja ab mahčymaści vajennych dziejańniaŭ na terytoryi respubliki.
Kali miascovym uładam heta atrymajecca, to ciapierašni palityčny režym Biełarusi budzie adčuvać siabie ŭ adnosnaj biaśpiecy, bo biełarusy buduć zaniepakojenyja nieisnujučaj źniešniaj pahrozaj, i kančatkova pierastanuć źviartać uvahu na prablemy ŭ ekanomicy i svajo źbiadnieńnie», — skančvajecca materyjał.
