 |
27 traŭnia atrymaŭ № 19 «Našaj Nivy» ad 22.05.2008. Atrymlivaŭ jaje i raniej, kali jašče byŭ u Miensku ŭ SIZA-1. Ahramadny vam dziakuj za dapamahu i padtrymku, jakuju vy akazvajecie mnie i majoj siamji. Bo ž u tym liku i dziakujučy vašaj hazecie my adčuvajem takuju ŭvahu i kłopat našych ziemlakoŭ.
A tut za kratami, dzie infarmacyju možna atrymać tolki słuchajučy radyjo i ź listoŭ, atrymańnie «NN» maje značeńnie, jakoje ciažka pieraacanić. Heta jak hłytok pavietra dla nyrca.
Chaciełasia b padziakavać usim, chto dasłaŭ vinšavańni i pažadańni na dzień narodzinaŭ, ale nia maju takoj mahčymaści čysta technična — nia chopić papiery i kapertaŭ. A jašče chaču pieradać svaju ŭdziačnaść tym ludziam, jakija pravodziać akcyi ŭ padtrymku palitźniavolenych, dapamahajuć nam maralna i navat materyjalna, nie zabyvajucca pra našych blizkich. Dziakujučy hetym Ludziam prychodzić upeŭnienaść u tym, što zrabiŭ spravu, patrebnuju ŭsiamu Narodu, i raście pierakananaść, što ściah, jaki sprabavaŭ nieści, nia budzie kinuty ŭ brud i rastaptany, a jaho padchopiać inšyja, jakija ŭstali zamiest mianie, raście ŭpeŭnienaść u chutkaj pieramozie. A inačaj i być nia moža — Śviatło i Praŭda zaŭsiody ŭ vyniku pieramahajuć ciemru i chłuśniu. I dla hetaj Pieramohi, viadoma ž, treba dobra papracavać i vytrymać peŭnyja vyprabavańni. Nichto j nia dumaŭ, što šlach da lepšaha žyćcia ŭ našaj rodnaj Biełarusi budzie lohkim i ŭsłany kvietkami.
Da taho, što trapiŭ siudy, za kraty, u niejkaj stupieni staŭlusia jak da naležnaha. Heta značyć, što ŭłady «hodna» acanili maju dziejnaść. I tyja biezzakońnie i biazładździe, jakim im daviałosia vykarystać, kab mianie siudy zasadzić, jašče bolš pavialičvajuć hetuju acenku. Heta značyć, što dyktatura panična baicca takich ludziej, jakija mohuć adstojvać intaresy prostaha čałavieka. Ułady adčuvajuć, što čym dalej, tym bolš narodu idzie za nami, ułady adčuvajuć svaju słabaść i niepaźbiežny kaniec. Ciažkaści, jakija adčuvaješ tut, za kratami, pastajannyja sproby prynizić čałaviečuju hodnaść tvaju albo ludziej, jakija znachodziacca pobač, prablemy z poštaj i h.d., jany ž tolki zahartoŭvajuć volu, robiać charaktar ćviardziejšym, a mety bolš žadanymi. Heta dadaje i zdarovaj złości. Złości nie da ludziej pa toj bok kamery, a da systemy, jakaja ich uzhadavała. A ich navat škada, tak, miarkujučy pa ich pavodzinach, jany sami razumiejuć svaju niepaŭnavartaść.
Hledziačy na našu moładź, najlepšych ludziej našaj Biełarusi, hledziačy na toje, što jany robiać dla źviaržeńnia dyktatury, ja razumieju, što ŭ našaj Radzimy jość budučynia, i heta budučynia śvietłaja, i jana za nami. A nas užo nie złamać! Možna, viadoma ž, źniščyć kankretnaha čałavieka, ale na jahonaje miesca ŭstanuć dziasiatki, sotni, tysiačy.
Pośpiechaŭ.
Z pašanaj,
Siarhiej Parsiukievič
P.S. Prabačcie za peŭny sumbur u liście. Mianie, kali pieraviali ŭ medčastku turmy, ź niejkaj, ja tak razumieju, usim zrazumiełaj metaj pasadzili ŭ kameru, dzie ŭ ludziej pastavili albo staviać dyjahnaz «nievmieniajem». Jany zaraz realna «aktyvizavalisia», i mnie ciažka zasiarodzicca. Ale navat tut, u hetaj “speckamery”, ludzi mianie razumiejuć, padtrymlivajuć i pavažajuć. Vielmi škada hetych ludziej… Im miesca nia tut.
***
Napišycie palitviaźniam
Parsiukievič Siarhiej Jahoravič:
213004, Mahiloŭskaja vobł., horad Škłoŭ, VK-17.
Kim Andrej Ivanavič
213000 Mahiloŭskaja vobł., horad Babrujsk,
vuł.Sikorskaha, 1, VK-2, atrad 11.
Kazulin Alaksandar Uładzisłavavič
211300 Viciebskaja vobłaść,
Viciebski rajon, pas. Vićba, VK-3, atrad 1
