Na śviet źjaviłasia pieršaje dzicia, dla začaćcia jakoha byli zadziejničanyja DNK troch čałaviek, paviedamlaje časopis New Scientist.
Ciapier niemaŭlaci Abrachimu Chasanu piać miesiacaŭ: u jaho kletkach DNK troch čałaviek — jaho maci, baćki i donara.
Hienietyčny materyjał donara pavinien dapamahčy dziciaci paźbiehnuć atrymańnia ŭ spadčynu hienaŭ maci, jakija mohuć pryvieści da raźvićcia chvaroby. Lekary ličać, što hetaja mietodyka adkryvaje novuju eru ŭ miedycynskich daśledavańniach i moža dapamahčy mnohim inšym siemjam z padobnymi situacyjami.
Baćki dziciaci rodam ź Iardanii. Maci dziciaci źjaŭlajecca nośbitam sindromu Leja — heta zachvorvańnie centralnaj niervovaj sistemy čałavieka. Pry hetym sama jana zdarovaja, ale praz hienietyčnuju mutacyju ŭ jaje zahinuła ŭžo dvoje dziaciej.
Parłamient Vialikabrytanii letaś uchvaliŭ adnu z technik začaćcia, u jakoj mohuć udzielničać try čałavieki. Padčas jaje apładniajucca adrazu niekalki jajcakletak, a niekatoryja embryjony źniščajucca. Adnak musulmanskaja para admoviłasia ad vykarystańnia hetaj techniki pa relihijnych mierkavańniach.
U vyniku muž i žonka źviarnulisia da navukoŭcaŭ z Centra pa lačeńni biaspłodździa «Novaja nadzieja» ŭ Ńju-Jorku, dzie pracujuć lekar Džon Čžan i jaho kamanda.
Navukoŭcy raspracavali novy mietad apładnieńnia, jaki praduhledžvaje pieranos jadra kletki. Navukoŭcy vyniali jadro ź jajcakletki maci i pieranieśli jaho ŭ jajcakletku donara, ź jakoj taksama było vydalenaje jadro. U vyniku, u ich atrymałasia jajcakletka z DNK maci i mitachondryjami donara. Mienavita ŭ mitachondryi ŭtrymlivajucca DNK, jakija pieranosiać sindrom Leja. Zatym navukoŭcy apładnili novuju kletku śpiermaj baćki.
Było atrymana piać embryjonaŭ, tolki adzin ź jakich raźvivaŭsia narmalna. Jaho ŭ vyniku i padsadzili da maci. Dzicia naradziłasia praź dzieviać miesiacaŭ.
Hety mietad pakul jašče nie byŭ uchvaleny ŭ ZŠA, tamu dla ažyćciaŭleńnia apieracyi amierykanskija navukoŭcy źjechali ŭ Mieksiku.
U śviecie ciapier žyvie kala 30-50 čałaviek, narodžanych ź jajcakletak, u jakija byli pierasadžanyja mitachondryi ad treciaj asoby. U ZŠA ŭ 1990-ch hadach pravodzilisia padobnyja ekśpierymienty pa lačeńni biaspłodździa. Zatym hetyja mietady byli zabaronienyja, bo niekatoryja dzieci pakutavali na anamalii hienietyčnaha raźvićcia.
