Moładzievuju arhanizacyju Partyi BNF «Moładź BNF» uznačaliŭ Juryj Łukaševič.
moladz.info
VI źjezd arhanizacyi adbyŭsia 9 kastryčnika ŭ Minsku. Jaho ŭdzielniki admianili rašeńnie papiaredniaha źjezda ab skasavańni pasady kiraŭnika. Paśla pryniaćcia źmianieńniaŭ u statut adbylisia vybary kiraŭnika, jakim staŭ Juryj Łukaševič.
«Prajaviŭsia jarki lidar, čaho ŭ «Moładzi BNF» užo daŭno nie było, — zajaviŭ u kamientary BiełaPAN staršynia Partyi BNF Alaksiej Janukievič. — Zaŭsiody lepš, kali ŭ arhanizacyi jość adzin kiraŭnik, jaki pracuje ŭ kampanii z astatnimi, čym kali niama adnaho tvaru ŭ arhanizacyi».
«Naša moładź vyrašyła, što ciapier farmat kiravańnia arhanizacyjaj budzie ažyćciaŭlacca nie praź dziejnaść savieta, a stanie bolš tradycyjnym z najaŭnaściu staršyni i jaho namieśnika», — dadaŭ staršynia partyi.
Delehaty źjezda taksama pryniali źmieny ŭ statut, jakija abmiažoŭvajuć znachodžańnie na pasadzie kiraŭnika arhanizacyi da dvuch razoŭ. Akramia taho, praduhledžana farmiravańnie savieta, jaki składajecca z namieśnikaŭ kiraŭnika arhanizacyi, kiraŭnikoŭ haradskich arhanizacyj i aktyvistaŭ, jakija kuryrujuć kankretnyja kirunki pracy.
Simvałam arhanizacyi byŭ zaćvierdžany hierb z vyjavaj fieniksa.
«Nam vielmi važna, što moładzievaja arhanizacyja atrymała novy impuls raźvićcia, prytok novych ludziej, — padkreśliŭ Janukievič. — Užo niekalki miesiacaŭ «Moładź BNF» pracuje bolš aktyŭna. Byŭ pieryjad źmieny pakaleńniaŭ, jaki zaciahnuŭsia, ciapier pryjšła novaja hienieracyja ludziej — heta vyklučna važna dla partyi. Kali ŭ partyi niama moładzievaj arhanizacyi, jaje budučynia pad sumnievam».
Mety «Moładzi BNF» — abjadnańnie biełaruskaj moładzi na asnovie kaštoŭnaściaŭ svabody, niezaležnaści i demakratyi, sadziejničańnie nacyjanalnamu adradžeńniu, biełarusizacyi, a taksama źmiena aŭtarytarnaha režymu i viartańnie da Kanstytucyi 1994 hoda.
Siarod zadač arhanizacyi značycca padrychtoŭka budučych lidaraŭ Partyi BNF, palityčnaja adukacyja i vychavańnie moładzi na hruncie nacyjanalnych kaštoŭnaściaŭ, papularyzacyja biełaruskaj movy, kultury, historyi, palapšeńnie imidžu BNF siarod nasielnictva i inšyja.
Kamientary