Pavodle źviestak Nacyjanalnaha banka, valutnyja pastupleńni Biełarusi za studzień—žnivień skłali 18,9 młrd dołaraŭ i źnizilisia ŭ paraŭnańni z anałahičnym pieryjadam minułaha hoda na 3,5 młrd dołaraŭ, ci na 15,6%.
Skaračeńnie valutnych pastupleńniaŭ Biełarusi ŭ hetym hodzie źviazana šmat u čym z pamianšeńniem ekspartnaj vyručki krainy.
Jak śviedčać źviestki Nacbanka, pastupleńni ad ekspartu tavaraŭ u studzieni—žniŭni 2016 hoda skłali 14,75 młrd dołaraŭ i źnizilisia na 17,5% u paraŭnańni z anałahičnym pieryjadam minułaha hoda. Valutnaja vyručka ad ekspartu pasłuh za zhadany pieryjad skłałasia na ŭzroŭni 3,69 młrd dołaraŭ i skaraciłasia na 8,1% u paraŭnańni sa studzieniem—žniŭniem 2016-ha.
Jak śviedčać danyja ab źniešnim handli, asnoŭny admoŭny ŭpłyŭ na dynamiku valutnaj vyručki Biełarusi akazała źnižeńnie (u hrašovym vyražeńni) ekspartu biełaruskich naftapraduktaŭ, nafty i kalijnych uhnajeńniaŭ, jakija realizujucca ŭ krainach Azii i Zachodniaj Jeŭropy.
Jak śledstva, valutnaja vyručka Biełarusi ŭ studzieni—žniŭni, jakaja pastupiła z krain pa-za SND, skłała 10,44 młrd dołaraŭ i źniziłasia ŭ paraŭnańni z anałahičnym pieryjadam minułaha hoda amal na 3,1 młrd dołaraŭ.
Varta zaznačyć, što ekspart tavaraŭ i pasłuh i, jak vynik, valutnaja vyručka Biełarusi źnižajecca ŭžo čaćviorty hod zapar. Tak, u 2013-m u paraŭnańni z 2012-m biełaruski ekspart źmienšyŭsia na 15,1%, u 2014-m — na 1,7%, u 2015-m — na 24,2%.
Na dumku biełaruskich ekanamistaŭ, źnižeńnie ekspartu i valutnaj vyručki Biełarusi abumoŭlenaje, hałoŭnym čynam, dźviuma pryčynami. Pieršaja — źmianšeńnie koštaŭ na suśvietnym rynku na ekspartavanyja Biełaruśsiu naftapradukty i skaračeńnie popytu na kalijnyja ŭhnajeńni, jakija taksama pradaje kraina na źniešnich rynkach.
«Inšaja pryčyna skaračeńnia valutnaj vyručki maje bolš hłybinnyja karani i źviazanaja z padzieńniem kankurentazdolnaści biełaruskich pradpryjemstvaŭ», — ličyć viadučy daśledčyk Biełaruskaha ekanamičnaha daśledča-adukacyjnaha centra (BEROC) Kaciaryna Barnukova.
Ustupleńnie Rasii ŭ Suśvietnuju handlovuju arhanizacyju ŭ 2012 hodzie, miarkuje ekśpiert, pryviało da taho, što kankurencyja na asnoŭnym rynku zbytu biełaruskaj pradukcyi ŭzrasła, i ajčynnym eksparcioram stała bolš składana jaje tudy pradavać.
Ciapier čytajuć
Dźmitryja Łukašenki nie było z baćkam i bratami na adznačeńni 3 Lipienia19
Kamientary