Paśla trahiedyi, jakaja adbyłasia 8 kastryčnika ŭ minskim handlovym centry «Novaja Jeŭropa», niekalki handlovych sietak źviarnulisia ŭ centr pavyšeńnia kvalifikacyi kirujučych rabotnikaŭ i śpiecyjalistaŭ «Centr śpiecyjalnaj padrychtoŭki» pa padrychtoŭku svaich supracoŭnikaŭ achovy, paviedamiŭ žurnalistam 13 kastryčnika namieśnik načalnika arhanizacyi Dźmitryj Dziemidovič.
Centr z 2010 hoda pravodzić śpiecyjalnuju i kontrterarystyčnuju padrychtoŭku śpiecyjalistaŭ dla padraździaleńniaŭ śpiecpryznačeńnia ŭsich siłavych struktur Biełarusi, a taksama inkasataraŭ, achoŭnikaŭ, ciełaachoŭnikaŭ, navučaje navykam vyžyvańnia i akazańnia pieršaj dapamohi, psichadyjahnostyki, kontravaryjnamu kiravańniu transpartnym srodkam, alpinizmu i h.d.
«Paśla trahiedyi da nas užo źviarnulisia kiraŭniki słužbaŭ biaśpieki niekalkich bujnych handlovych sietak z prośbaj padrychtavać ich słužbu achovy da dziejańniaŭ u nadzvyčajnych situacyjach», — skazaŭ Dziemidovič.
Na jaho dumku, farmiravać sistemu navučańnia ludziej ałharytmu dziejańniaŭ u niestandartnych situacyjach, u tym liku akazańnia pieršaj dapamohi, pavinny nie tolki pradstaŭniki MNS, siłavych struktur i achovy zdaroŭja, ale i subjekty haspadarańnia, samo nasielnictva pavinna prajaŭlać inicyjatyvu.
«U svajoj biaśpiecy i zdaroŭi pavinny być zacikaŭleny sami hramadzianie, treba heta razumieć, — skazaŭ Dziemidovič. — Pavinna być niejkaja matyvacyja, kab nie prymušać ludziej, a kab jany sami prychodzili».
Pryjemna, adznačyŭ jon, što ŭ centr źviartajucca pradstaŭniki supolnaściaŭ ekstremalnych vidaŭ sportu, strałkovych i piejntbolny kłubaŭ, kłubaŭ matacyklistaŭ. «Tut my ščaślivyja bačyć inicyjatyvu — ludzi iduć navučacca pieršaj dapamozie i hatovyja płacić hrošy za toje, kab u krytyčnych situacyjach dziejničać efiektyŭna», — skazaŭ Dziemidovič.
Pradstaŭnik centra zajaviŭ, što padtrymlivaje inicyjatyvu Ministerstva achovy zdaroŭja ab stvareńni dziaržaŭnaj sistemy navučańnia navykam akazańnia pieršaj dapamohi dziaciej i padletkaŭ na bazie ŭstanoŭ adukacyi.
«Takija zaniatki ŭ škole pavinny być abaviazkovymi, — ličyć jon. — Na moj pohlad, kali kazać ab pierahruzcy vučnia, to niachaj lepš jon atrymaje mienš viedaŭ, naprykład, pa chimii, fizicy ci litaratury, ale jon budzie viedać, jak vyžyć. Tamu što kali jon stracić žyćcio, to ŭsie jaho školnyja viedy nikomu karyści nie pryniasuć».
U svaju čarhu načalnik adździeła pa reahavańni na NS i vyšuku Biełaruskaha tavarystva Čyrvonaha Kryža Dźmitryj Rusakoŭ źviarnuŭ uvahu na toje, što nasielnictva ŭ cełym biezynicyjatyŭnaje ŭ płanie navučańnia pieršaj dapamozie i dziejańniam u nadzvyčajnych situacyjach nie tamu, što abyjakavaje da svajho žyćcia i zdaroŭja. Viartajučysia da situacyi z napadam u HC «Novaja Jeŭropa», jon adznačyŭ, što kožny čałaviek naiŭna ŭpeŭnieny ŭ tym, što mienavita ź im takoje zdarycca nie moža, a taksama nikoha ratavać nie daviadziecca.
Miž tym, nahadaŭ partnior advakackaha biuro «Leŭ, Šarstnioŭ i partniory» Dźmitryj Fiedaraka, dziaržavaj na hramadzian uskładajecca abaviazak akazvać dapamohu asobam, jakija apynulisia ŭ niebiaśpiečnaj dla žyćcia situacyi. Jon ukazaŭ na artykuł 159 KK Biełarusi, jaki praduhledžvaje adkaznaść za nieakazańnie dapamohi i pakidańnie čałavieka ŭ niebiaśpiečnym dla žyćcia stanie.
