Sud Pieršamajskaha rajon Minska pryhavaryŭ da troch miesiacaŭ aryštu Alaksandra Śviryda (1989 h.n.), jaki 10 lipienia na vulicy Kalinoŭskaha napaŭ na pikiet pa zbory podpisaŭ za vyłučeńnie kandydatam u deputaty Pałaty pradstaŭnikoŭ pieršaha namieśnika staršyni ruchu «Za Svabodu» Juryja Hubareviča.
pyx.by
Akramia taho, asudžany pavinien vypłacić paciarpiełamu členu inicyjatyŭnaj hrupy Hubareviča Alaksandru Rusieviču 300 rubloŭ kampiensacyi maralnaj škody. Jamu Śviryd nanios dva ŭdary ŭ hałavu i adzin — u tułava.
Jak paviedamiŭ BiełaPAN Hubarevič, u sudzie prahučała, što ŭ Śviryda vyklikaŭ abureńnie zbor podpisaŭ pad bieł-čyrvona-biełym ściaham, pry hetym da incydentu abvinavačvany vypiŭ butelku harełki. Takija pavodziny Śviryda, na dumku Hubareviča, treba aceńvać jak «pavodziny čałavieka, zambavanaha prapahandaj, dla jakoha hramadstva ŭ Biełarusi padzielena na svaich i čužych, dla jakoha apazicyja — heta ludzi pa-za zakonam, jakich možna źbivać i abražać».
«Jaho pavodziny — vynik šmathadovaj palityki ŭłady ŭ dačynieńni da apazicyjnaj častki hramadstva», — ličyć surazmoŭca.
Na jaho dumku, u dačynieńni da Śviryda abrana nie samaje žorstkaje pakarańnie. Artykuł, pa jakim asudžany mužčyna, praduhledžvaje taksama abmiežavańnie voli da dvuch hadoŭ i pazbaŭleńnie voli da troch hadoŭ.
