Unučka Ryhora Baradulina Daminika. Fota citydog.by
Ryełtar i pazaštatny vykładčyk BDU Alaksandr Haraščenia, jaki na svajoj staroncy ŭ fejsbuku nazvaŭ Ryhora Baradulina «nacysckaj svołačču», paprasiŭ prabačeńnia ŭ svajakoŭ narodnaha paeta.
«Prynošu svaje prabačeńni blizkim paeta. Maje słovy vyhladali haniebna…» — skupa napisaŭ jon u sacsietkach, pry hetym adznačyŭšy, što jaho słovy nie tyčacca tych, «chto telefanavaŭ z pahrozami».
U razmovie z «Kamsamolskaj praŭdaj» ryełtar patłumačyŭ, što paprasiŭ prabačeńnia nie z-za šumichi i nie z-za pahroz, jakija jamu masava prychodziać, a tamu, što jamu sapraŭdy niajomka.
«Mnie svajaki telefanavali, ź imi my pahavaryli pa-čałaviečy, jany znajšli maje vybačeńni vyčarpalnymi», — dadaŭ Alaksandr.
Ale svajakoŭ u dziadźki Ryhora zastałosia tolki troje — žonka, dačka i ŭnučka. Nichto ź ich pra prabačeńni ničoha nie viedaje.
«Ja dakładna ni z kim nie źviazvałasia i sa mnoj nichto nie źviazvaŭsia, — ździŭlajecca ŭnučka Ryhora Baradulina Daminika, jakoj było pryśviečana niamała tvoraŭ narodnaha paeta. — Maja babula nie siadzić u internecie i, vidać, kab nie turbavać jaje ŭ takim uzroście, joj nichto ničoha nie kazaŭ. Tamu joj ja tolki siońnia raskazała pra heta ŭsio. A dačka Ryhora Baradulina ciapier znachodzicca za miažoj, adpaviedna, ź joj taksama nichto nie źviazvaŭsia».
Daminika dadała, što hatovaja baranić pamiać dziaduli. Na hety kont dziaŭčyna ŭžo razmaŭlała sa stvaralnikam kursaŭ «Mova Nanova» i hramadskim aktyvistam Hlebam Łabadzienkam, jaki adrazu zajaviŭ, što źvierniecca ŭ prakuraturu, kab tam dali pravavuju acenku vykazvańniam Haraščeni.
«Ja ŭžo ŭsio padrychtavaŭ, — kaža Hleb. — Jašče ŭčora zapakavaŭ u kanviert, ale nie paśpieŭ zanieści, bo spaźniaŭsia na kursy. Ale siońnia dakładna adpraŭlu. Budu dasyłać zakaznym listom».
Ciapier Hleb Łabadzienka šukaje jurysta, jaki dapamoža siamji Ryhora Baradulina skłaści jurydyčna pravilny zvarot u kampietentnyja orhany dla abarony honaru i hodnaści pamiaci narodnaha paeta.