Nastaśsia Ziaziulkina. Fota: facebook.com.
Dvuchrazovaja čempijonka śvietu, najlepšaja biełaruskaja šachmatystka Nastaśsia Ziaziulkina pakul nie viedaje, ci budzie ŭdzielničać u čempijanacie. Najpierš treba prajści adbor, jaki jašče napieradzie.
«Ale ŭ lubym vypadku, kali b ja ŭdzielničała, to z pavahaj pastaviłasia b da hetaha patrabavańnia, — kamientuje Nastaśsia. — Adnojčy adzin z najbujniejšych turniraŭ sieryi Hran-pry prachodziŭ u Iranie, i prablem z hetym nie było. Udzielnicy spakojna nasili chidžab.
Kali heta patrabavańnie krainy, dzie adbyvajucca spabornictvy, to što tut zrobiš? Heta niazvykła, ale kali tak treba, značyć, treba… Iranskija šachmatystki dosyć mocnyja i zasłuhoŭvajuć taho, kab turnir takoha vysokaha ranhu pravodziŭsia ŭ ich krainie».
Amierykanskaja šachmatystka hruzinskaha pachodžańnia Nazi Paikidze-Barns niadaŭna zajaviła, što kali čempijanat nie pieraniasuć u inšuju krainu, jana budzie vymušanaja admovicca ad udziełu ŭ im. Jana nie suprać Irana ci jakoj-niebudź relihii, ale nie moža pahadzicca z zakonami, jakija abmiažoŭvajuć jaje pravy jak žančyny.
«Nie toje, što ja asudžaju ci nie asudžaju rašeńnie Nazi, heta prosta dva roznyja pohlady na adno i toje ž pytańnie», — skazała Nastaśsia.