Siem faktaŭ pra siem čynoŭnikaŭ, jakich pryznačyŭ Łukašenka
Alaksandr Łukašenka zładziŭ kadravy aŭtorak. Dva dziasiatki čynoŭnikaŭ atrymali novyja pasady. «NN» sabrała cikavyja fakty pra niekatorych ź ich.
Pasłom u Hiermanii staŭ «vunderkind»
Hod tamu nie stała pasła Biełarusi ŭ Hiermanii Andreja Hiro. Jon pamior ad ankałahičnaha zachvorvańnia ŭ 48 hadoŭ. Uvieś hety čas pasada pradstaŭnika Biełarusi ŭ klučavoj krainie Jeŭrasajuza była vakantnaj. Novamu pasłu Dzianisu Sidarenku 40 hadoŭ. Jon pracavaŭ načalnikam upraŭleńnia ahulnajeŭrapiejskaha supracoŭnictva pry MZS. Dośvied dypłamatyčnaj pracy za miažoj Sidarenka ŭžo maje. Jon pracavaŭ namieśnikam kiraŭnika biełaruskaj delehacyi pry ABSIE ŭ Vienie. U struktury MZS novapryznačany pasoł dastatkova daŭno — ad 90-ch hadoŭ. Kali jon tolki pryjšoŭ na pracu, to jaho nazyvali «vunderkindam». Apošniaje paciapleńnie ŭ adnosinach Biełarusi i ES u tym liku zasłuha i Dzianisa Sidarenki.
Novy kiraŭnik Leninskaha rajona razvažaŭ pra prajavy fašyzmu va Ukrainie
Na niadaŭniaj sustrečy Alaksandra Łukašenki z kiraŭnikom Pałaty pradstaŭnikoŭ Uładzimiram Andrejčankam havorka išła ŭ tym liku pra ŭładkavańnie na pracy deputataŭ, jakija nie prajšli ŭ novaje sklikańnie parłamienta. Ad słovaŭ pierajšli da spravy. Były deputat Piatro Šostak staŭ kiraŭnikom administracyi Leninskaha rajona Minska. Jamu 50 hadoŭ, da abrańnia ŭ parłamient zajmaŭ pasadu staršyni Rečyckaha rajvykankamu. Paśla 4 hadoŭ u stalicy viartacca na Homielščynu Šostaku, mabyć, nie duža chaciełasia.
U adnym ź intervju deputat Šostak vykazaŭsia na temu padziej va Ukrainie: «Biełaruś, Rasija i Ukraina źjaŭlajucca brackimi dziaržavami, jakija źviazvajuć poviazi ahulnaj šmatviakovaj historyi. Na supiarečnaściach, jakija ŭźnikajuć pamiž nami, nieadnarazova sprabavali hulać i vykarystoŭvać ich u karyślivych metach źniešnija siły. Stanovišča, jakoje skłałasia na terytoryi susiedniaj dziaržavy, aceńvaju jak krytyčnaje, napružanaje i niestabilnaje. Karupcyja, usiodazvolenaść, adsutnaść naležnaha kantrolu z boku kiraŭnictva krainy za raźvićciom ekanomiki pryviali da takich realij. Prajavy fašyzmu liču niedapuščalnymi, i zmahacca z hetym treba ŭsim śvietam», — kazaŭ Šostak.
Davieranuju asobu Łukašenki pryznačyli ŭ Brescki abłvykankam
Aleh Vialička ŭ svoj čas taksama pabyŭ deputatam Pałaty pradstaŭnikoŭ (2008 — 2012). Apošnija čatyry hady jon byŭ hałoŭnym uračom Bresckaj centralnaj haradskoj balnicy. Ciapier jon zojmie pasadu namieśnika staršyni Bresckaha abłvykankama. Admietna toje, što na minułych prezidenckich vybarach Aleh Vialička źjaŭlaŭsia davieranaj asobaj Alaksandra Łukašenki. Jon jeździŭ z ahitacyjaj za kiraŭnika krainy pa haradach i rajonach Brestčyny.
Z Administracyi prezidenta — u Viciebski abłvykankam
Uładzimir Pienin pryznačany namieśnikam staršyni Viciebskaha abłvykankama. Da hetaha ŭ abaviazki čynoŭnika ŭvachodziła adkazvać na listy, jakija prychodziać u Administracyju prezidenta. Tam Pienin uznačalvaŭ upraŭleńnie pa rabocie sa zvarotami hramadzian i jurydyčnych asob.
Samy małady kiraŭnik rajona Minska
37-hadovy Arciom Curan pryznačany hałavoj Administracyi Frunzienskaha rajona Minska. Samaha vialikaha ŭ horadzie, adpaviedna adnaho z samych prablemnych. Curan rodam z Hłybokaha, jon skončyŭ Biełaruski pieduniviersitet imia Maksima Tanka. Pracavaŭ na «Minskim zavodie aciaplalnaha abstalavańnia». Apošnim časam jon byŭ načalnikam upraŭleńnia arhanizacyjna-kadravaj raboty ŭ Minharvykankamie. Curan byŭ sakratarom u Minskaj haradskoj vybarčaj kamisii. Aburaŭsia niejkaj naziralnicaj, jakaja zabyłasia na ŭčastku zahadzia padrychtavanuju skarhu. Arciom Curan karystajecca sacsietkami, prynamsi, jon maje akaŭnty ŭ «Adnakłaśnikach» i Fejsbuku. U «Adnakłaśnikach» adna z fotak padpisanaja pa-biełarusku: «Śpiakota ŭ Fieadosii — 2009». Ni ŭ jakich supołkach čynoŭnik nie ŭdzielničaje, statusy taksama nie piša.
Byłuju pradavačku pryznačyli ŭ Minharvykankam
Hanna Macielskaja krychu bolš za hod prabyła kiraŭnikom Centralnaha rajona Minska, ciapier jaje pieraviali na pracu ŭpraŭlajučaj spravami Minharvykankama.
Spadaryni Macielskaj 46 hadoŭ. Jana rodam z Vałožynščyny, ź vioski Miejšty, što niedaloka ad Ivianca. Paśla škoły Hanna Macielskaja pastupiła ŭ Minskaje kaapieratyŭnaje praftechvučylišča, dzie pravučyłasia hod. Paśla budučuju čynoŭnicu raźmierkavali ŭ Tałačynski rajon.
Spačatku Hanna Macielskaja pracavała zvyčajnaj pradavačkaj, paśla — zahadčycaj mahazina. Urešcie — instruktaram pa arhanizacyi i technicy handlu Tałačynskaha rajspažyŭsajuza. U 1997 hodzie Hanna Macielskaja skončyła Homielski kaapieratyŭny instytut pa śpiecyjalnaści «tavaraznaŭca niecharčovych tavaraŭ».
Kryminalista — u VAK
Alaksandr Hučok staŭ namieśnikam kiraŭnika Vyšejšaj atestacyjnaj kamisii (VAK). Jamu 50 hadoŭ. Skončyŭ jurfak BDU, potym byŭ dacentam kafiedry kryminalistyki. U 2003 hodzie pierajšoŭ na pracu ŭ Hienieralnuju prakuraturu. Zajmaje pasadu namieśnika dyrektara DU «NPC prablem umacavańnia zakonnaści i pravaparadku Hienieralnoj prakuratury». U 2014 abaraniŭsia na navukovaje zvańnie doktara jurydyčnych navuk na temu «Kryminalistyčnaje vučeńnie ab materyjalnaj struktury złačynstva». U BDU vykładaje «Mietodyku rasśledavańnie asobnych vidaŭ złačynstvaŭ».
Kamientary