Karespandent BiełaPAN Alena Spasiuk była vydalenaja ź mižnarodnaj navukova-praktyčnaj kanfierencyi «Zdaroŭje i navakolnaje asiarodździe» z pahrozaj prymianieńnia siły.
Kanfierencyja prachodzić u Minsku 27—28 kastryčnika i pryśviečana 90-hodździu sanitarna-epidemijałahičnaj słužby Biełarusi. Infarmacyja pra mierapryjemstva była zahadzia raźmieščana ŭ adkrytym dostupie na sajcie RUP «Navukova-praktyčny centr hihijeny», pryčym umovy ŭdziełu žurnalistaŭ u joj nie ahavorvalisia.
Ranicaj 28 kastryčnika Alena Spasiuk, pakazaŭšy redakcyjnaje paśviedčańnie, prajšła rehistracyju na plenarnaje pasiadžeńnie kanfierencyi, jakoje prachodzić u Navukova-praktyčnym centry hihijeny. Za piać chvilin da pačatku mierapryjemstva vučony sakratar centra Śviatłana Itpajeva-Ludčyk paprasiła žurnalista BiełaPAN pakinuć zału, arhumientujučy heta tym, što na kanfierencyi mohuć znachodzicca tolki tyja žurnalisty, jakich zaprašała administracyja centra. U adkaz Spasiuk zajaviła, što jana prajšła rehistracyju i pradstaŭlaje aficyjna zarehistravany ŭ Biełarusi srodak masavaj infarmacyi.
Paśla hetaha da Spasiuk u supravadžeńni vučonaha sakratara padyšoŭ namieśnik dyrektara pa haspadarčaj rabocie RUP «Navukova-praktyčny centr hihijeny» Hienadź Łosieŭ, jaki taksama zapatrabavaŭ, kab žurnalistka pajšła. Spasiuk admoviłasia syści i papiaredziła, što vykliča milicyju, kali joj buduć pieraškadžać vykonvać prafiesijnyja abaviazki. Niahledziačy na heta, Łosieŭ zabraŭ sa stała asabistyja rečy žurnalistki, uklučajučy mabilny telefon i dyktafon. «Vy chočacie, kab my vyvieli vas za ruki?» — pacikaviŭsia jon.
Incydent adbyvaŭsia ŭ prysutnaści šmatlikich udzielnikaŭ kanfierencyi, u vyniku žurnalistka była vymušanaja vyjści z zały pasiadžeńnia. Łosieŭ supravadžaŭ jaje da vychadu z budynka centra.
Na pytańnie, ci viedaje jon pra prava žurnalistaŭ aśviatlać hramadskija mierapryjemstvy, a taksama pra palityku adkrytaści pracy dziaržorhanaŭ, pra jakuju nieadnarazova zajaŭlali čynoŭniki ŭsich uzroŭniaŭ, Łosieŭ adkazaŭ: «NPC hihijeny — heta režymny abjekt. Vy siudy nie zaprošanyja, zajaŭku vy nie padavali. Vy parušyli ŭsio, što tolki možna parušyć».
Z nahody rehistracyi na kanfierencyju, jakuju prajšła Spasiuk, jon zajaviŭ: «Jość normy, jak pravilna pavodzić siabie akredytavanym žurnalistam. U nas svaje ŚMI, jakija atrymlivajuć hrošy, — niachaj pracujuć».
Infarmacyjnaja kampanija BiełaPAN rasceńvaje dziejańni čynoŭnika jak aburalny vypadak parušeńnia zakanadaŭstva Biełarusi ab ŚMI i harantavanaha Kanstytucyjaj prava na svabodu słova.
BiełaPAN aficyjna źviarnuŭsia da dyrektara RUP «Navukova-praktyčny centr hihijeny» Siarhieja Syčyka z prośbaj pravieści słužbovuju pravierku i vyznačyć u dačynieńni da Itpajevaj-Ludčyk i Łosieva miery dyscyplinarnaha spahnańnia, a taksama prainfarmavać svaich padnačalenych ab asnoŭnych pryncypach pracy z supracoŭnikami ŚMI z punkta hledžańnia palityki adkrytaści dziaržaŭnych orhanaŭ.
Anałahičnyja listy nakiravanyja ŭ adras ministra achovy zdaroŭja Vasila Žarko i ministra infarmacyi Lilii Ananič.
